Daha əvvəl Touadera qeyd etmişdi ki, CAR-ı mövcud təhdidlərdən qorumaq üçün dronlar və ya hətta onların istehsalının qurulması vacibdir.
Gündəm24.az xəbər verir ki, Mərkəzi Afrika Respublikası (CAR) Rusiya ilə hərbi-texniki əməkdaşlığı yeni mərhələyə daşımaq niyyətindədir.
CAR prezidenti Faustin-Archange Touadera seçkilərdə qələbədən sonra TASS-a verdiyi ilk müsahibəsində ölkəsində Rusiya ilə birgə pilotsuz uçuş aparatları (PUA) operatorlarının təlim mərkəzinin yaradılmasının planlaşdırıldığını açıqlayıb. Prezident bildirib ki, mövcud təhlükəsizlik çağırışları fonunda dron texnologiyaları və hətta onların istehsalının qurulması ölkə üçün həyati əhəmiyyət daşıyır.
Touadera Rusiya ilə birgə PUA operatorlarının təlim mərkəzinin açılması ilə bağlı suala cavabında bu təşəbbüsü açıq şəkildə dəstəkləyərək, “Bu, bizim səmimi istəyimizdir”, – deyə vurğulayıb. Onun sözlərinə görə, belə bir mərkəz CAR silahlı qüvvələrinin imkanlarını əhəmiyyətli dərəcədə artıracaq.
Rusiyanın Mərkəzi Afrika Respublikasındakı səfiri Aleksandr Bikantov da mövzu ilə bağlı açıqlamasında CAR ordusunun yaxşı təchiz olunduğunu və Rusiyanın dəstəyi ilə daim inkişaf etdiyini bildirib. Diplomat qeyd edib ki, Rusiya CAR-ın əsas hərbi-texniki tərəfdaşı olaraq silahlı qüvvələrin formalaşdırılmasında mühüm rol oynayır.
Səfirin sözlərinə görə, Moskva ilə Banqi arasında hərbi-texniki əməkdaşlıq perspektivləri strateji əhəmiyyət daşıyır. Rusiya CAR ordusunun müasir, kompakt və özünütəmin edən bir quruma çevrilməsinə dəstək göstərir və bu əməkdaşlıq gələcəkdə daha da genişlənə bilər.
Sədaqət Həsənova
