Alimlərin fikrincə, günəş küləkləri milyardlarla ildir ki, Yer atmosferindən ayrılan hissəcikləri Aya daşıyır. Tədqiqatlar göstərib ki, Yerin maqnit sahəsi bu prosesə mane olmur, əksinə onu dəstəkləyə bilər.
Gündəm24.az xəbər verir ki, Astronomlar yeni araşdırmada milyardlarla ildir Yer atmosferindən ayrılan molekulların Ay səthinə daşındığını və torpaqla qarışdığını təsdiqləyiblər. Tədqiqat göstərir ki, Günəşdən gələn yüklü hissəciklər – günəş küləkləri – Yer atmosferindən materialları kosmosa sürükləyir və nəticədə Ay səthinə çatdırır.
Araşdırmaya görə, Ay hər ay Yer kürəsinin “maqnit quyruğu” adlanan bölgəsindən keçir və bu zaman Yer atmosferindən ayrılan hissəciklər birbaşa Ay səthinə çata bilir. Atmosferi olmayan Ayda bu hissəciklər torpaq qatına yerləşir və uzun geoloji zaman ərzində oksigen, azot və digər uçucu qazların ötürülməsinə səbəb olur.
Nyu-Yorkdakı Roçester Universitetinin professoru Erik Blekman bildirib ki, bu nəticələr Yer və Ay arasında maddə mübadiləsinin yalnız əmələ gəlmə zamanı deyil, milyardlarla il boyunca davam etdiyini göstərir. Tədqiqatçılar həmçinin bildiriblər ki, Yer kürəsinin maqnit sahəsi bu prosesi dayandırmaq əvəzinə asanlaşdırmış ola bilər.
Bu araşdırma Apollon missiyaları zamanı Aydan gətirilən nümunələrdə aşkarlanan su, karbon qazı, helium və azot kimi maddələrin mənşəyini aydınlaşdırır və Ay torpağının Yer kürəsinin qədim atmosferinin mühüm kimyəvi qeydlərini saxlaya biləcəyini göstərir. Tədqiqat dekabr ayında Nature Communications Earth & Environment jurnalında dərc edilib.
Sədaqət Həsənova
