Rusiya Xarici İşlər Nazirliyinin sözçüsü Mariya Zaxarova bildirib ki, Ukraynadakı hər hansı bir xarici hərbi mövcudluq Rusiya Silahlı Qüvvələri tərəfindən “qanuni hədəf” hesab ediləcək.
Gündəm24.az xəbər verir ki, Rusiya Xarici İşlər Nazirliyinin sözçüsü Mariya Zaxarova bildirib ki, Ukrayna ərazisində yerləşdirilən bütün xarici hərbi birləşmələr, mənsubiyyətindən asılı olmayaraq, Rusiya Silahlı Qüvvələri üçün “qanuni hədəf” hesab ediləcək. Onun sözlərinə görə, Ukraynadakı istənilən xarici hərbi mövcudluq, o cümlədən Böyük Britaniyanın iştirakı da istisna təşkil etmir.
Zaxarova qeyd edib ki, mümkün “çoxmillətli qüvvələr” də eyni çərçivədə qiymətləndiriləcək. Yanvarın əvvəlində Parisdə keçirilən “Könüllü Tərəflər Koalisiyası”nın görüşündə Ukraynaya uzunmüddətli hərbi dəstək və sülh müqaviləsi halında qoşunların yerləşdirilməsi məsələləri müzakirə olunub.
Rusiya Xarici İşlər Nazirliyi NATO qüvvələrinin Ukraynada yerləşdirilməsini qətiyyən qəbuledilməz sayaraq bunun ciddi eskalasiya riski yaratdığını bildirib. Kremlin sözçüsü Dmitri Peskov isə münaqişənin davamının Kiyev üçün mənasız və təhlükəli olduğunu vurğulayaraq, danışıqlara başlamağa çağırıb.
Sədaqət Həsənova
