Tibbi Ərazi Bölmələrini İdarəetmə Birliyində (TƏBİB) baş verən son dəyişikliklər səhiyyə sistemində yeni və daha dərin proseslərin anonsu kimi qiymətləndirilir. Vüqar Qurbanovun TƏBİB-in icraçı direktoru vəzifəsindən azad edilməsi rəsmi açıqlamalarda “adi qərar” kimi təqdim edilsə də, kulis məlumatları tamamilə fərqli mənzərədən xəbər verir. Xüsusilə Modern.az saytının sabiq rəhbərin yaxın günlərdə həbs olunacağı ilə bağlı iddiası gündəmi daha da qızışdırıb.
Rəsmi qurumlar hələlik detalları açıqlamasa da, yayılan məlumatlar bunun sadə kadr dəyişikliyi olmadığını göstərir. İddialar maliyyə intizamı, satınalmalar və idarəetmə mexanizmləri ətrafında mümkün hüquqi araşdırmaların aparıldığını önə çəkir. Bütün bunlar isə Vüqar Qurbanovun vəzifədən uzaqlaşdırılmasının səhiyyə sistemində daha ciddi proseslərin başlanğıcı ola biləcəyi ehtimalını gücləndirir.
İndiki məqamda Vüqar Qurbanov həbs oluna bilərmi?
Globalinfo.az-a danışan vəkil Rəsul Cəfərov deyib ki, Vüqar Qurbanovun həbs olunacağına dair rəsmi məlumat yoxdur:
“Hər hansı hüquqpozma və ya qanun pozuntusu baş veribsə, rəsmi qaydada ittiham irəli sürülməlidir. Bu mərhələdə qətimkan tədbiri məsələsi də həll olunur. Qətimkan tədbiri qismində həbs, ev dustaqlığı və ya qanunvericilikdə nəzərdə tutulmuş digər alternativ tədbirlər tətbiq edilə bilər.
Rəsul Cəfərov
Şəxs barəsində ittiham irəli sürülsə, onun haqqında həbs, ev dustaqlığı və ya digər məhdudlaşdırıcı tədbirlərin seçilməsi məsələsinə qanun çərçivəsində baxılacaq”.
Siyasi şərhçi Şakir Ağayevin sözlərinə görə isə, məsələ Vüqar Qurbanovun vəzifədən azad edilməsi ilə məhdudlaşmır:
“İddialara görə, burada daha ciddi məqamlar və araşdırılmalı proseslər var. Hətta mediada milyonlarla, yüz milyonlarla manat həcmində rəqəmlər səsləndirilir. Ümumilikdə TƏBİB-də ciddi çatışmazlıqların olduğu sirr deyil. İstər tenderlərin təşkili, istər maliyyə idarəçiliyi, istərsə də ümumi idarəetmə mexanizmləri baxımından problemlər açıq şəkildə müşahidə olunur. Təsəvvür edin, vətəndaşların sığortadan istifadə etməsi üçün günlərlə gözləməsi, bir analiz, USM və ya digər müayinədən keçmək üçün bir neçə dəfə tibb müəssisəsinə müraciət etməsi sistemin səmərəsiz işlədiyini göstərir. Elektron növbə mexanizmlərinin tam tətbiq olunmaması, insanların vaxt itkisi ilə üzləşməsi, təcili tibbi yardım və digər xidmət sahələrində yaşanan çətinliklər idarəetmədə ciddi boşluqlardan xəbər verir”.
Şakir Ağayev
Ş.Ağayev deyib ki, müxtəlif mənbələrdə 260 milyon manata yaxın vəsaitdən danışılır:
“Lakin bu iddiaların doğru olub-olmadığını yalnız hüquq-mühafizə orqanlarının araşdırması müəyyən edə bilər. Əgər iddialar sübuta yetirilərsə, söhbət kifayət qədər böyük məbləğlərdən getdiyi üçün hüquqi məsuliyyət, o cümlədən həbs qərarı da istisna edilmir”.
Siyasi şərhçinin fikrincə, problemlər təkcə kadr dəyişikliyi ilə həll olunmur:
“Ramil Bayramlıdan sonra Vüqar Qurbanovun təyinatı da sistemdə əsaslı dönüş yaratmadı. Deməli, məsələ şəxslərin dəyişdirilməsi deyil, sistemli və dərin islahatların aparılmasıdır. Müasir dövrdə elektron hökumət platformalarının genişləndiyi, rəqəmsallaşma və süni intellekt tətbiqlərinin sürətlə inkişaf etdiyi bir vaxtda minlərlə insanın növbələrdə saatlarla gözləməsi qəbulolunan deyil. Səhiyyə sistemi köklü şəkildə yenilənməli, müasir idarəetmə prinsiplərinə uyğunlaşdırılmalı və effektiv nəzarət mexanizmləri formalaşdırılmalıdır. Yalnız bu halda real və davamlı dəyişikliklərə nail olmaq mümkündür”.
