Rusiyanın Leninqrad vilayətində yerləşən Primorsk neft limanında azı dörd neft rezervuarının yandığı bildirilir.
Bakupost.az “Radio Free Europe/Radio Liberty” tərəfindən yayımlanan peyk görüntülərə istinadən xəbər verir ki, görüntülər Ukraynanın pilotsuz uçuş aparatlarının (PUA) hücumundan sonra limanda bir neçə yanacaq çəninin zədələndiyini göstərir.
Məlumata görə, Rusiya rəsmiləri hücum nəticəsində cəmi bir yanacaq çəninin zədələndiyini açıqlamışdı. Yayımlanan peyk şəkillərində ən azı dörd rezervuarda yanğın baş verdiyi görünür .
Eyni zamanda “Reuters” agentliyi yerli mənbələrə istinadən bildirib ki, Rusiyanın Baltik dənizində yerləşən ən böyük neft limanları – Primorsk Neft Terminalı və Ust-Luga Portu PUA hücumları səbəbindən martın 22-dən etibarən xam neft və neft məhsullarının ixracını müvəqqəti dayandırıb.
Hadisə ilə bağlı Rusiya rəsmilərinin əlavə açıqlaması hələlik yayılmayıb. Ukrayna tərəfi isə hücumla bağlı rəsmi məlumat verməyib.
