İranın xarici işlər naziri Abbas Əraqçi region ölkələrini ABŞ-nin təhlükəsizliyi təmin edə bilmədiyini qəbul etməyə və Amerika qüvvələrinin Yaxın Şərqdən dərhal çıxarılmasını dəstəkləməyə çağırıb. Əraqçi “X” sosial şəbəkəsində yazıb ki, İran Səudiyyə Ərəbistanına hörmətlə yanaşır və onu qardaş ölkə hesab edir.
Nazir qeyd edib ki, İranın hücumları ərəbləri və iranlıları dəyərləndirməyən, regionun təhlükəsizliyini təmin etməyə qadir olmayan aqressiv düşmənə qarşı yönəlib. Trampın bu mövqelə razılaşmayacağı nəzərə alınarsa, bölgədə gərginlik daha uzun çəkə bilərmi?
Sfera.az-a bu barədə açıqlama verən siyasi şərhçi Tural İrfan İran ətrafında gərginlyin artacağını söyləyib. T. İrfanın fikirinə əsasən, ABŞ Körfəz ölkələrini sadəcə iqtisadi yöndən istila edib:
“Onların nefti və sərvəti ABŞ üçün lazımdır, eyni zamanda təhlükəsizlikləri də bu baxımdan önəm daşıyır. Əks halda, elə bir şərait yaradır ki, İran raketləri həmin ölkələrə isabət etsin və bu dövlətləri İran əleyhinə müharibəyə cəlb etsin. Vaşinqtonda müharibənin xərclərinin ərəb ölkələrinin boynuna qoyulması müzakirə olunur. ABŞ qüvvələrinin Yaxın Şərqdən çıxarılması barədə qərarı qəbul etmək əzmində olmayan ərəb ölkələri buna heç bir etiraz edə bilməzlər. Əksinə, Səudiyyə Ərəbistanı və BƏƏ ABŞ liderliyində İrana qarşı savaşa qoşula bilər. Ancaq ABŞ qüvvələri Yaxın Şərqdən çıxdığı halda, həmin bölgədə İranın hegemonluq etməsi də böyük təhdiddir. Hər halda, sözügedən ölkələr özləri bir çətir altında, vahid bir qurumda birləşməli, Türkiyənin himayəsini qəbul etməlidirlər. Əks halda, ABŞ və İran arasında istifadə ediləcək və təhlükəsizlikləri də təmin olunmayacaqdır. İsrail knessetinin dünən Fələstin məhbuslarının edamını təsdiqləyən qanunu qəbul etməsi ərəb ölkələrində ciddi narahatlığa səbəb olub. Eyni zamanda, müsəlmanlar üçün böyük əhəmiyyət daşıyan Əqsa Məscidinin ibadətə bağlanması İsrailin İran savaşı kölgəsində əsl məramını ortaya qoyur”.
Siyasi şərhçi əlavə edib ki, ABŞ İran və ətrafındakı müsəlman ölkələri ilə məşğul olduğu bir vaxtda, İsrail də tədricən qonşu ölkələrin istila və işğalını davam etdirir: “
Bu siyasətin nəticəsi artıq İslam aləminə qarşı yönəlmiş kimi görünür. Sanki İran bəhanədir, əsas hədəf İslam aləmidir. Bu gedişatın nəticəsində körfəz ölkələri ağır təhqirlərə, istila və vassallığa məruz qala bilərlər. Amma onların ən azı ABŞ qədər qüdrətə malik bir himayəçisi olmalıdır ki, bu da Türkiyə olacaq. Gərginlik daha da artacaq. Çünki ABŞ və İsrail vəziyyəti elə həddə gətirib çıxarıb ki, gərginliyin artmasından başqa yol qalmayıb. Müharibənin əhatəsi İsrailə ciddi zərər vuracaq dərəcədə, hətta onun təhlükəsizliyinə zərbə sayılacaq qədər genişlənəcək. İrandakı İsrail agentliyi Türkiyəyə üçüncü raketi atıb. Lakin Türkiyə hələ də İran əleyhinə təxribata getmir. Artıq müharibənin İran rejiminə qarşı deyil, regionda müsəlman istilasına xidmət etdiyi ortaya çıxır. Bu məqsədin məlum olması həm dünyada müsəlman ölkələrini hərəkətə keçirir, həm də İran xalqını öz qəddar rejiminin ətrafında birləşməyə məcbur edir. Çünki onları “xilas etməyə” gələn ABŞ və İsrailin öz rejimlərindən heç də geri qalmadığını görürlər. ABŞ prezidenti Səudiyyə Ərəbistanı vəliəhdini dünya ictimaiyyəti qarşısında təhqir edib. ABŞ rəsmiləri əslində hədəfin İslam olduğunu açıq şəkildə dilə gətirirlər. Bu reallıqlar göstərir ki, müharibə hələ təzə başlayır və daha həlledici mərhələ hələ qabaqdadır”.
