Yaxın Şərqdə təhlükəsizlik məsələləri uzun illərdir beynəlxalq gündəmin əsas mövzularından biridir. Xüsusilə son dövrlərdə terror hücumlarının artması bir sıra ölkələri daha sərt hüquqi və hərbi tədbirlər görməyə vadar edir. Bu kontekstdə İsrail tərəfindən terrorla mübarizə çərçivəsində ölüm cəzasının tətbiqini nəzərdə tutan yeni qanun təşəbbüsü ciddi müzakirələrə səbəb olub. Bəzi ekspertlər bunu təhlükəsizliyin gücləndirilməsi istiqamətində vacib addım hesab etsə də, digərləri belə sərt cəzaların əks-effekt verə biləcəyini düşünür.
Maraqlıdır, İsrailin yeni ölüm cəzası qanunu terror hücumlarının qarşısını alacaqmı?
Mövzu ilə bağlı siyasi şərhçi Pərviz Mirizadə Sfera.az-a açıqlama verib.
O bildirib ki, İsrail Knessetinin fələstinli məhkumlara ölüm hökmünü nəzərdə tutan mübahisəli qanun layihəsini qəbul etməsi bölgədə onsuz da gərgin olan siyasi mühiti daha da mürəkkəbləşdirəcək bir qərardır:
“İstər Qəzza problemi, istərsə də digər məsələlər fonunda İsrail həbsxanalarında çox sayda fələstinli məhbus yatır və göründüyü üzrə qanun layihəsinin tətbiqinə başlanılması, həmçinin prosesin nümayişkəranə şəkildə reallaşdırılması hər hansı bir çəkindirmədən daha çox qarşı tərəfdə qisas hissini alovlandıracaq situasiyadır”.
Siyasi şərhçi qeyd edib ki, bu isə etnik və dini zəmində toqquşmaları artıra bilər:
“Eyni zamanda bu tip insan haqlarını kobud şəkildə təhrif edən layihənin Knessetdə xüsusi canfəşanlıqla qəbul edilməsi İsrailin illərdir “Holokost” üzərindən formalaşdırdığı məzlum obrazın beynəlxalq ictimaiyyət tərəfindən birmənalı qarşılanmamasına səbəb ola bilər. Artıq Qəzzada baş verənlər çərçivəsində İsrailin nüfuzunun aşağı düşməsi heç kimə sirr deyil”.
