Dünyada tütünlə mübarizə tədbirləri getdikcə sərtləşdirilir. Artıq Türkiyədə də siqaretin tam qadağan edilməsinə dair qanun layihəsi hazırlanıb. Belə ki, layihəyə əsasən, 2040-cı ilə qədər siqaret və digər tütün məhsullarından mərhələli şəkildə imtina nəzərdə tutulur. Qaydaların pozulmasına görə 1 milyondan 10 milyon lirəyə (38-380 min manat) qədər ciddi cərimələrin tətbiqi planlaşdırılır. Bu məsələ Azərbaycanda da diqqət mərkəzindədir.
Ölkəmizdə də siqaretdən istifadə tam qadağan edilə bilərmi?
Gündəm24.az xəbər verir ki, globalinfo.az-a danışan deputat Fazil Mustafa deyib ki, Azərbaycanda siqaretin tam qadağan edilməsi nəzərdə tutulmur:
“Çünki bu addım tütün istehsalına mənfi təsir göstərə bilər. Dövlət müəyyən dərəcədə tütün istehsalını stimullaşdırır və bəzi bölgələr bu sahədə ixtisaslaşıb. Həmin məhsulların ixrac potensialı da mövcuddur. Düzdür, həm tütün, həm də spirtli içkilər sağlamlıq üçün zərərlidir. Buna baxmayaraq, bəzi ölkələrdə bu məhsullara tələbat olduğu üçün dövlət bu sahədən tam imtina etməyi məqsədəuyğun hesab etmir”.
Deputat bildirib ki, ölkəmizdə tütün məmulatlarından istifadənin məhdudlaşdırılması ilə bağlı qanun qüvvədədir:
“Bununla müəyyən cərimələr nəzərdə tutulur. Lakin bu qanunun tətbiqi hələ tam effektiv deyil. Tam qadağa tətbiq olunarsa, bu, qara bazarın genişlənməsinə səbəb ola bilər. Belə hallarda məhsulların qeyri-rəsmi yollarla satışı artır ki, bu da korrupsiya risklərini gücləndirir. Məsələnin həlli daha çox maarifləndirmə və sağlam həyat tərzinin təşviqi ilə bağlıdır. Qadağalar bəzən əks effekt verə və insanları zərərli vərdişlərdən uzaqlaşdırmağı çətinləşdirə bilər. Mən də siqaret və spirtli içkilərin istifadəsinin əleyhinəyəm, özüm də istifadə etmirəm. Lakin cəmiyyətdə bu məhsullara tələbatın mövcudluğu nəzərə alınmalıdır. Ona görə də yanaşma daha çox tədrici və məhdudlaşdırıcı olmalı, tam qadağadan isə çəkinilməlidir”.
