5 oktyabr – Müəllimlər Günü münasibətilə Qərbi Azərbaycan İcmasının Sumqayıt Nümayəndəliyində tədbir keçirilib. Tədbirdə nümayəndəliyin idarə heyətinin üzvləri,şura üzvləri, müəllimlər, ziyalılar iştirak edib.Gündəm24.az xəbər verir ki, tədbiri nümayəndəliyin sədri Ramiz İsmayılov açaraq, müəllimlərin cəmiyyətin inkişafındakı rolundan danışıb və bütün təhsil işçilərini bayram münasibətilə təbrik edib.
Toplantı çərçivəsində cari məsələlər müzakirə olunub. Xüsusilə Sumqayıtda yaşayan Qərbi Azərbaycanlıların siyahıya alınması, həmçinin Qərbi Azərbaycan kökənli şəhid İmaməli Hüseynovun ailəsi ilə görüşün təşkili istiqamətində qərarlar qəbul olunub.
Eyni zamanda, Qərbi Azərbaycan adı altında keçirilən tədbirlərə nəzarət mexanizminin hazırlanması məsələsinə toxunulub.
Tədbir zamanı Sevindik Hüseynov, Bəxşeyiş Ələmşahov, Hüseyn Babayev, Xankərəm Vəliyev ,Akif Şahbazov və Nazim Hüseynov çıxış edərək cari məsələlərlə bağlı fikirlərini bildiriblər. Natiqlər icma daxilində aparılan işlərin əhəmiyyətindən, birliyin və həmrəyliyin qorunmasının vacibliyindən danışıblar. Qərbi azərbaycanlıların tarixinin, mədəni irsinin və ənənələrinin gələcək nəsillərə ötürülməsi istiqamətində görülən tədbirlər yüksək qiymətləndirilib. Həmçinin gənclərin maarifləndirilməsi, ictimai fəallığın artırılması və Sumqayıtda yaşayan qərbi azərbaycanlıların vahid şəkildə siyahıya alınması ilə bağlı fikir mübadiləsi aparılıb. Çıxış edənlər bu istiqamətdə görülən işlərə dəstək verməyin hər bir icma üzvünün vətəndaşlıq borcu olduğunu vurğulayıblar.
Həmçinin Nazim Hüseynovun Qərbi Azərbaycan İcmasının Sumqayıt nümayəndəliyinin Corat qəsəbəsi üzrə nümayəndəsi təyin olunması məsələsi müzakirə olunub və səs çoxluğu ilə qəbul olunub. Daha sonra icmanın Tağıyev qəsəbəsi üzrə nümayəndəsi Mehriban İsmayılova, Nümayəndəliyin gənclər şurasının sədri Fuad Məmmədov çıxış edərək gələcək fəaliyyət istiqamətlərini daha da genişləndirmək üçün atılacaq gərəkli addımlardan danışıblar. Tədbirin sonunda tədbir iştirakçıları xatirə şəkili çəkdiriblər.
