“The Wall Street Journal” qəzeti İranın ali rəhbərliyi ilə bağlı sensasiyalı iddialarla çıxış edib. Nəşrin məlumatına görə, ölkənin ali rəhbəri Müctəba Xameneyinin fevralın 28-də baş verən hava hücumunda ağır yaralanmasından sonra iki aydan çoxdur ictimaiyyət qarşısına çıxmaması Tehranda ciddi fikir ayrılıqlarına yol açıb. Qəzet iddia edir ki, həmin hücum mərhum ali lider Əli Xameneyi və həyat yoldaşının ölümü ilə nəticələnib.
NOCOMMENT.az xəbər verir ki, Müctəba Xameneyinin uzun müddətdir görünməməsi rejim tərəfdarları arasında ABŞ ilə danışıqlara münasibətdə ixtilafları kəskinləşdirib. Mövcud qeyri-müəyyənlik fonunda İran hakimiyyətinin yeni liderin iştirakı və rəsmi mövqeyi olmadan müharibəyə son qoymaq üçün gizli razılaşma yolları axtardığı bildirilir. Hakimiyyətin bu müddət ərzində Müctəba Xameneyiyə aid heç bir yeni foto və ya səs yazısı yayımlamaması isə vətəndaşlar arasında onun həyatda olub-olmaması ilə bağlı şübhələri daha da artırıb.
