Britaniya Geoloji Xidməti Yer kürəsində yeni bir maqnit qasırğasının baş verəcəyi barədə xəbərdarlıq edib.
Gündəm24.az xəbər verir ki, alimlərin fikrincə, mayın 10-da Günəşdə baş verən koronal kütlə atılmasının təsir riski var.
Mütəxəssislər qeyd edirlər ki, atılan maddənin böyük hissəsi çox güman ki, Yerə çatmayacaq, lakin toxunma zərbəsi aktivliyi artıra və G1 səviyyəli qısamüddətli maqnit fırtınasına səbəb ola bilər.
Eyni zamanda, mayın 15-də Günəşdəki tac dəliyindən gələn yüksək sürətli günəş küləyi axınının planetimizə çatacağı gözlənilir.
“Bu, böyük və təkrarlanan bir hadisədir. Geomaqnit aktivlik G1/G2 səviyyəli maqnit fırtınasına qədər yüksələcək”, – deyə ekspertlər bildirir.
Qeyd edək ki, G2 səviyyəsi orta dərəcəli hesab edilən 6 ballıq maqnit fırtınasıdır. G2 səviyyəli fırtınalar həm texnologiyaya, həm də insanların sağlamlığına təsir göstərə bilər.
Belə günlərdə baş ağrıları, halsızlıq, təzyiq oynamaları, yuxusuzluq və yüksək yorğunluq müşahidə oluna bilər. Həmçinin, rabitə və GPS sistemlərinin işində bəzi kəsintilərin yaranması mümkündür.
Maqnit fırtınasını daha yüngül keçirmək üçün həkimlər daha çox istirahət etməyi, bol su içməyi, stressdən, alkoqoldan və ağır fiziki yüklərdən qaçmağı tövsiyə edirlər.
Meteohəssas insanlar üçün bu müddətdə təzyiqi nəzarətdə saxlamaq və yuxu rejiminə riayət etmək xüsusilə vacibdir./musavat.com.
