Slovakiya Baş naziri Robert Fitsonun Rusiya paytaxtına gözlənilən səfəri ilə bağlı verdiyi kəskin bəyanat beynəlxalq mediada geniş əks-səda doğurub. Baş nazir 9 May Qələbə günü münasibətilə Moskvaya edəcəyi səfərə görə Almaniya kansleri Fridrix Mertsin Slovakiyaya planlaşdırılan rəsmi səfərini ləğv etməsi barədə yayılan iddialara münasibət bildirib.
Gündəm24.az xəbər verir ki, Fitso jurnalistlərə açıqlamasında bu cür diplomatik gedişlərin onun qərarlarına təsir etməyəcəyini vurğulayaraq, “Əgər kimsə Moskvaya getdiyim üçün mənimlə görüşü ləğv edərsə, mən Rusiya paytaxtına daha üç dəfə gedərəm” deyə bildirib.
Bununla belə, Baş nazir Mertsin sırf bu səbəbdən səfərdən imtina etməsinə inanmadığını, belə bir addımın Almaniya kansleri tərəfindən ciddi bir siyasi səhv olacağını qeyd edib. Fitsonun sözlərinə görə, Moskvanı ziyarət etməsi fonunda görüşün təxirə salınması hətta onun üçün belə “həddindən artıq” və qeyri-etik bir davranış kimi qiymətləndirilməlidir./NOCOMMENT.az
