Gündəm24.az xəbər verir ki, İsrailin Livana hücumları davam edir. Livanın rəsmi xəbər agentliyi NNA-nın yaydığı məlumata görə, İsrail döyüş təyyarələri Tir şəhərinin şərq hissəsinə hava zərbələri endirib. Hücumlar zamanı şəhərdə yerləşən yaşayış binası və kafe də bombalanıb.
Yerli media Tir şəhər mərkəzində bir neçə binanın hədəfə alındığını bildirib. Hadisədən sonra axtarış-xilasetmə qrupları dağıntılar altında qalan insanlara çatmaq və baş verən yanğınları söndürmək üçün əməliyyatlara başlayıb.
İsrail ordusu açıqlamasında Tir şəhərində Hizbullaha məxsus infrastrukturun vurulduğunu iddia edib. Ordunun sözçüsü Aviçay Adraee isə hücumlardan əvvəl şəhər sakinlərini evlərini tərk etməyə və Zehrani çayının şimalına keçməyə çağırmışdı.
Xatırladaq ki, İsrail ordusu martın 2-dən etibarən Livana qarşı genişmiqyaslı hava hücumlarına başlayıb və ölkənin cənubundakı bir sıra yaşayış məntəqələrinə nəzarəti ələ keçirib. Livan hökumətinin məlumatına görə, hücumlar nəticəsində ölkədə məcburi köçkünlərin sayı bir milyonu keçib.
ABŞ-ın vasitəçiliyi ilə tərəflər arasında əldə olunan müvəqqəti atəşkəs bir neçə dəfə uzadılsa da, bölgədə gərginlik davam edir. Livan Səhiyyə Nazirliyinin son məlumatına əsasən, martın 2-dən bu yana İsrailin hücumları nəticəsində 3269 nəfər həyatını itirib.
Atəşkəs qüvvədə olsa belə, İsrail ordusu Livanın cənubunda əməliyyatlarını davam etdirir. Hizbullah isə İsraili razılaşmanı pozmaqda ittiham edərək qarşı tərəfə hücumlar təşkil etdiyini açıqlayır.
Sədaqət Həsənova
