Rusiyada həbs həyatı yaşamış iki azərbaycanlı məhbusun cəzaçəkmə müəssisələrində qarşılaşdıqları dəhşətli faktlar ortaya çıxıb. Onlar Rusiya Müdafiə Nazirliyi ilə müqavilə imzalamağa və Ukraynaya qarşı müharibəyə yollanmağa necə məcbur edildiklərini ifşa ediblər.
Gündəm24.az NOCOMMENT.az-a istinadən xəbər verir ki, əslən Azərbaycandan olan keçmiş məhbuslar — İntiqam Hüseynzadə və Sahib Balaoğlanov Rusiya koloniyalarında cəza çəkərkən təzyiqlərə məruz qaldıqlarını bildiriblər. Onların sözlərinə görə, Rusiya Federal Cəzaçəkmə Xidməti (FSİN) və Müdafiə Nazirliyi koordinasiyalı şəkildə məhbusları kars (cəza kamerası) və ağır şəraitlə təhdid edərək, onları faktiki olaraq cəbhəyə yollanmaq barədə müqavilə imzalamağa məcbur edib.
Hər iki soydaşımız Ukrayna cəbhəsinə göndərildikdən sonra qarşılaşdıqları ağır xidmət şəraitindən və hərbi hissədə hökm sürən qorxu mühitindən danışıblar. Keçmiş məhkumlar onlara vəd edilən aylıq təxminən 200 min rubl (təribən 3700 AZN) məbləğindəki ödənişlərin demək olar ki, heç vaxt verilmədiyini vurğulayıblar. Eyni zamanda, tabe olduqları hərbi bölmədə dözülməz nəzarətin olduğunu, hətta ayaqyoluna belə konvoy müşayiəti ilə getdiklərini bildiriblər.
Şikayətçilər cəbhə xəttində insan həyatına heç bir dəyər verilmədiyini deyərək, yaralı məhbusların çox vaxt döyüş meydanından təxliyə edilmədiyini, həlak olan əsgərlərin cəsədlərinin isə həftələrlə mövqelərdə buraxılaraq daşınmadığını qeyd ediblər.
