“Dünən keçirilən tədbirdə elm və təhsil naziri Emin Əmrullayevin fikirlərindən belə məlum oldu ki, tamştatlı müəllimlərlə bağlı model ilkin mərhələdə sertifikasiyada uğur qazanmış 20 min müəllim üzərində pilot layihə kimi tətbiq olunacaq. Sonrakı mərhələlərdə isə bunun genişləndirilməsi məqsədəuyğun hesab edilir. Ancaq fakt ondan ibarətdir ki, bu gün hələ tamştatlı müəllimlərlə bağlı təşəbbüslə əlaqədar vahid qərar yoxdur. Biz hələ onların hansı şərtlər daxilində fəaliyyət göstərəcəklərini, necə işləyəcəklərini bilmirik”.
Bu barədə Redaktor.az-a açıqlamasında təhsil eksperti Məzahir Məmmədli elm və təhsil naziri Emin Əmrullayevin mərhələli şəkildə 20 min tamştatlı müəllim vəzifəsinin yaradılmasının nəzərdə tutulması və bu statusu qazanan müəllimlərin bundan sonra sertifikatlaşdırma prosesinə cəlb olunmayacaqları barədə verdiyi açıqlamanı şərh edərkən danışdı.
“Eyni zamanda nazir onu da bildirdi ki, bu proses paralel gedəcək. Məsələn, indiyə qədər saat hesabı dərs deyən müəllimlər fəaliyyətlərini əvvəlki qaydada davam etdirəcəklər. Yəni bütün nəticələrinə görə həmin qaydada işləməyə davam edəcəklər. Ancaq tamştatlı müəllim vəzifəsinin yaradılması digər müəllimlərin nə hüquqlarına, nə dərs yükünə, nə də digər sahələrə təsir edəcək. Bir məsələ də odur ki, indiyədək sertifikasiyada yaxşı nəticə göstərməyən müəllimlər onsuz da sistemdən kənarlaşdırılırdı. İndi daha çox müzakirə olunan məsələ ondan ibarətdir ki, tamştatlı müəllimlər təyin olunduqdan sonra digər müəllimlərin sistemdən kənarlaşdırılması gündəmə gələcək. Ancaq nazirin öz açıqlamasından da məlum oldu ki, bu, yalnız uyğun bilinməyən müəllimlərə şamil olunacaq. Yəni indiyə qədər necə idisə, bundan sonra da həmin qaydada davam edəcək. Ancaq bu 20 min tamştatlı müəllimin nə vaxt fəaliyyətə başlayacağı, statusunun necə olacağı və iş qrafikinin necə müəyyənləşdiriləcəyi hələ bəlli deyil. Ona görə də bir qədər səbirli olub gözləmək lazımdır ki, görək bu sistem necə formalaşdırılır və qaydalar necə olacaq. İndidən bunu şərh etmək, məncə, bir qədər çətindir”, – deyə o bildirdi.
