Gundem24.az xəbər verir ki, Türkiyənin Balıkəsir vilayətinin Sındırgı rayonunda yerli vaxtla saat 22:48-də 6,1 bal gücündə zəlzələ baş verib. Hadisə barədə məlumatı Fövqəladə Halların İdarə Olunması Agentliyi (AFAD) yayıb.
Məlumata görə, zəlzələnin episentri Sındırgı rayonu, ocağı isə yerin 5,99 kilometr dərinliyində yerləşib. Güclü təkanlar İstanbul, İzmir, Bursa, Çanaqqala, Tekirdağ və Manisa da daxil olmaqla, Marmara və Egey bölgələrində aydın şəkildə hiss olunub.
AFAD bildirir ki, əsas təkanlardan sonra ən güclüsü 4,2 bal olmaqla ümumilikdə 26 artçı zəlzələ qeydə alınıb. İlk artçı 22:50-də, sonrakılar isə 22:51 və 23:04-də baş verib. Artçıların dərinliyi 5,1–23,8 kilometr arasında dəyişib.
“Təxminən 100 kilometrlik səth yırtılıb” — Prof. Dr. Şener Üşümezsoy
Türkiyəli seysmoloq Prof. Dr. Şener Üşümezsoy CNN Türk telekanalına açıqlamasında bildirib ki, bu hadisə afterşok deyil, yeni qırılmanı tətikləyən əsas zəlzələdir: “Bu, Sındırgı bölgəsində daha əvvəl baş verən zəlzələnin davamıdır, lakin yeni bir qırılma xətti üzərində meydana gəlib. Təxminən 100 kilometrlik bir səth yırtılıb. Qırılma Sındırgının 7–8 kilometr cənub-şərqində, dağlıq ərazidə baş verib”.
Ekspertin sözlərinə görə, Sındırgı sakinlərinin daha böyük zəlzələdən narahat olmasına ehtiyac yoxdur: “Bu hadisə əvvəlki Balıkəsir–Sındırgı zəlzələsinin bir hissəsidir. Sanki şifonyerin gözləri kimi – biri qırıldıqdan sonra digəri də qırıldı. Bu, afterşok deyil, tətikləyici zəlzələdir. Hazırda fay xəttindəki gərginlik tam boşalıb”.
Üşümezsoy əlavə edib ki, gecəni açıq havada keçirməyə gərək yoxdur: “6,1 bal gücündəki zəlzələ ilə birlikdə 10 kilometrlik hissə də qırıldı və həmin fayda enerji boşalıb. Bu gecə artçılar olacaq, lakin 6,1 baldan güclü təkanlar gözlənilmir. Ən çoxu 4,9 bal gücündə sarsıntılar ola bilər”.
“İstanbul üçün təhlükə yoxdur”
Professor qeyd edib ki, Sındırgıdakı zəlzələ Marmara (İstanbul) bölgəsində gözlənilən böyük zəlzələyə təsir etməyəcək: “Bu zəlzələ Marmara zəlzələsini tətikləməz. Mən əvvəllər ‘piano klaviaturası’ bənzətməsi etmişdim – bir tuş basıldıqda digəri səs vermir. Buradakı zəlzələlər fərqli qırılma xətləri üzərindədir”.
Hazırda AFAD, Jandarma və digər xilasedici qüvvələr bölgədə araşdırma aparır, dağıntıların miqyası qiymətləndirilir və zərərçəkənlərə yardım göstərilir.
Rəsmi məlumatlara əsasən, can itkisi qeydə alınmayıb. \\musavat.com
