Bu gün, avqustun 15-də Azərbaycan teatr və kino sənətinin görkəmli nümayəndəsi, Xalq artisti, “Şərəf” və “Şöhrət” ordenli, Prezidentin fəxri təqaüdçüsü Afaq Bəşirqızının doğum günüdür. Sevilən sənətkar 71 yaşını qeyd edir.
Gündəm24.az xəbər verir ki, əməkdaşı Xalq artistinin doğum günü münasibətilə hisslərini, yaradıcılıq planlarını və qarşıdakı dövr üçün arzularını öyrənib.
Müsahibəni təqdim edirik:
-Doğum gününüzü necə qeyd edirsiniz? Sağlamlığınız necədir, özünüzü necə hiss edirsiniz?
-Allaha şükür! Belə bir gündə gərək hər şeyə “yaxşıyam, gözələm, sağlamam, şükürlər olsun” deyəsən. Ümumiyyətlə, maşallah, yaxşıyam. Yavaş-yavaş artıq bərpa olunuram. Ad günümü də ailəmlə, yaxınlarımla birgə keçirəcəyik.
-Nəvənizi də bu günlərdə əsgər yola saldınız…
-Hə… Onun üçün çox darıxıram. Amma yanında bir o qədər də büruzə verməməyə çalışıram. Allah qoysa, inşallah, bir az vaxt keçsin, yanına gedəcəm.
-Afaq xanım, sentyabrda başlayacaq yeni mövsümdə sizi teatrda və serialda görə biləcəyikmi?
-Əlbəttə. Mən “Space” kanalı ilə birillik müqavilə bağlamışam. Bu, bir sürpriz olacaq. Həm serial, həm də tamaşaçılarla görüş xarakterli gözəl bir veriliş yayımlanacaq.
-Bəs teatrda?
-Əlbəttə, teatrda da planlarım var. Allah qoysa, inşallah, mütləq reallaşdıracağıq.
-Yeni yaşını qeyd edən Afaq Bəşirqızına nə arzulamaq istərdiniz?
-Mən Afaq Bəşirqızına yalnız və yalnız cansağlığı arzulayıram. Cansağlığı olanda Afaq Bəşirqızı çox güclü olur və istədiyi arzuları Allahın köməkliyi ilə yerinə yetirə bilir. O arzular da yalnız səhnədə olmaq, tamaşaçıları təbəssümə və gülüşə həsrət qoymamaqdır”.\\musavat.com
