Qərbi Azərbaycan kəndləri – Güllücə
Güllücə — Qərbi Azərbaycanın Ağbaba mahalında, keçmiş Amasiya rayonunda yerləşmiş qədim Azərbaycan kəndlərindən biri. Kənd tarixən azərbaycanlıların, əsasən qarapapaqların məskunlaşdığı yaşayış məntəqəsi olub.
XIX əsrin sonu və XX əsrin əvvəllərində Güllücədə azərbaycanlı əhalinin sayı artıb. 1886-cı ildə kənddə 193, 1897-ci ildə 288, 1908-ci ildə 324, 1914-cü ildə isə 378 nəfər azərbaycanlının yaşadığı qeyd olunur.
1916–1918-ci illərdə bölgədə baş verən hadisələr zamanı kəndin azərbaycanlı əhalisi də təqiblərə məruz qalıb və sakinlərin bir hissəsi doğma yurdunu tərk etməyə məcbur olub. Sovet hakimiyyəti qurulduqdan sonra onların bir qismi Güllücəyə geri qayıdıb. 1922-ci ildə kənddə 517, 1926-cı ildə 553, 1931-ci ildə isə 576 nəfər azərbaycanlı yaşayıb.
Sonrakı illərdə də kənddə azərbaycanlı əhali üstünlük təşkil edib. 1939-cu ildə 624, 1959-cu ildə 594, 1979-cu ildə isə 985 nəfər azərbaycanlının yaşadığı göstərilir. Güllücə sakinlərinin əsas məşğuliyyəti heyvandarlıq və əkinçilik olub.
1988–1989-cu illərdə Ermənistan ərazisində yaşayan azərbaycanlıların deportasiyası zamanı Güllücə kəndinin sakinləri də öz doğma yurdlarından çıxarılıb. Mənbələrdə həmin dövrdə kənddə 182 evdə 1091 nəfər azərbaycanlının yaşadığı qeyd edilir.
Güllücə kəndinin adı 1991-ci ildə dəyişdirilərək Tsaxkut qoyulub. Buna baxmayaraq, Güllücə adı keçmiş sakinlərin yaddaşında qorunub saxlanılır və kənd Qərbi Azərbaycanın tarixi Azərbaycan yaşayış məntəqələrindən biri kimi xatırlanır.
Qərbi Azərbaycan İcması Sumqayıt Nümayəndəliyi
Ramiz İsmayılov
