Tanınmış cərrah Xəyal Aşurəliyev Azərbaycanın səhiyyə sistemi və İcbari Tibbi Sığorta (İTS) mexanizmində mövcud olan ciddi problemlər, həmçinin həkimlərin üzləşdiyi ağır iş şəraiti ilə bağlı sərt və rezonans doğuran paylaşım edib.
Gündəm24.az nocomment.az-a istinadən xəbər verir ki, cərrah sosial şəbəkə hesabında İcbari Tibbi Sığortanı məhkəməyə vermək istədiyini bildirərək, həkim əməyinə verilən aşağı qiyməti və üzləşdikləri mənəvi-maddi basqıları məhkəmə prosesi formatında təsvir edib.
Xəyal Aşurəliyev
Həkim misal olaraq qeyd edib ki, 3 aylıq qüsurlu uşağın 3 saatlıq ümumi narkoz altında həyata keçirilən ağır əməliyyatına görə icbari sığorta tərəfindən ona cəmi 80 manat ödənilir: “Əl boyda qüsurlu bir körpənin 3 saatlıq əməliyyatından 80 manat alacağımı bilə-bilə, bu stresi yaşamaq mənə rəvamıdır?! Bu 3 saatlıq stressdən ötrü anestezioloq 20 manat alacaq. Vicdanına and verirəm hakim dayı, anestezioloq 20 manatdan ötrü bu əziyyəti, bu öhdəliyi, bu cavabdehliyi götürməlidirmi?”.
Xəyal Aşurəliyev cəmiyyətin həkimlərə qarşı haqsız münasibətindən də gileylənib. O bildirib ki, vətəndaşlar müayinə talonunda yazılan məbləği (məsələn, 25 manatı) həkimin tam aldığını düşünürlər, lakin reallıqda həmin məbləğdən həkimo cəmi 1 manat 80 qəpik çatır və nəticədə cəmiyyət tərəfindən hədəfə tuş gəlirlər.
Cərrah başına gələn real hadisələrdən danışaraq qeyd edib ki, Ombudsman tərəfindən tapşırılan qüsurlu körpənin əməliyyatı zamanı məsuliyyət və risklərin təkrarən həkimin üzərinə yıxıldığını görüb. O, gecə saat 11-də 40 qızdırma, yüksək CRP və leykositlərlə gətirilən 9 aylıq ağır xəstəni əməliyyat etdiyini, 15 gün boyunca hər gün sarğı dəyişib irin təmizlədiyini, lakin İcbari Tibbi Sığortanın bu gərgin əməyə görə ona cəmi 32 manat ödədiyini vurğulayıb.
Həkim bildirib ki, məhz bu cür qəpik-quruş və ağır məsuliyyət üzündən artıq bir çox mütəxəssislər risk qrupu daşıyan xəstələri əməliyyata götürməkdən çəkinirlər: “İndi siz deyin, hakim bəy, biz necə davranmalıyıq, başımızı aşağı salıb işimizimi görməliyik, rüşvətmi almalıyıq, yoxsa ölkədənmi getməliyik? Ya da siz onlara deyin ki, bu gün xalqın övladı xəstədirsə, sabah o xəstə sizin də evinizdə olacaq və o ağır xəstənizi əməliyyat edəcək həkim tapmayacaqsınız”.
