“Əhalimiz artır, lakin artım tempi azalır. Statistik məlumatlara görə, keçən il doğum göstəricisi 1,48-dir. Hazırda biz böyük bir fəlakətlə üz-üzəyik”.
Gündəm24.az Globalinfo.az-a istinadən xəbər verir ki, bu fikirləri Türkiyə Prezidenti Rəcəb Tayyib Ərdoğan deyib.
“Sosial media və rəqəmsal platformalarda insanla yanaşı, ailəni, cəmiyyət strukturumuzu və müqəddəs dəyərlərimizi hədəf alan məzmunlarla effektiv mübarizə aparırıq. Daha əvvəl müxtəlif məqamlarda vurğuladığım bu məsələyə bir daha diqqətinizi çəkmək istəyirəm: Əhalimiz artır, lakin əhali artım sürətimiz azalır. 2008-ci ildə ailədə orta rəqəm 4 nəfər idisə, 2024-cü ildə bu göstərici 3,011-ə enib. Gələcəyimiz baxımından həyəcan siqnalı çalır. Bu ölkənin gələcəyini düşünən heç kim buna laqeyd qala bilməz.
Burada açıq şəkildə deməliyəm: Bəylər əsəbiləşməsinlər, amma qadınlar uşaqları böyütmək məsələsində çox vaxt həyat yoldaşlarından lazım olan dəstəyi ala bilmirlər. Yükün böyük hissəsi təəssüf ki, qadınların çiyninə düşür”.
Rəcəb Tayyib Ərdoğan çıxışı zamanı LGBT məsələsinə də toxunub:
“Qlobal kapitalizmin yeni cəbhələr açdığı, mədəni imperializm və rəqəmsal mühasirənin dünya üzrə gücləndiyi bir dövrdə, ailə institutuna xüsusi diqqət yetiririk. Cinsiyyətsizləşdirmə təşəbbüslərinə və LGBT kimi axınlara qarşı bütün zəruri tədbirləri görürük. Bu nöqtədə ən kiçik güzəştə, laqeydliyə və ya səhlənkarlığa yol vermirik”.
