Qırğızıstanın keçmiş Prezidenti Almazbek Atambayevin oğlu Kadırbek Atambayev saxlanılıb.
Gündəm24.az Globalinfo.az-a istinadən xəbər verir ki, bu barədə ölkənin Daxili İşlər Nazirliyi (DİN) məlumat yayıb.
Məlumata görə, o, kütləvi iğtişaşların təşkilində ittiham olunur.
İstintaq prosesində birinci xanım Raisa Atambayeva da iştirak edib. Qızı Aliyə Şaqiyevanın sözlərinə görə, ailənin mənzilində axtarış səhər saat 6-da başlayıb. Daha sonra Raisa da, Kadırbek də polis tərəfindən istintaqa cəlb olunub. Şaqiyeva baş verənləri siyasi təqib və hüquqların pozulması adlandırıb. Raisa Atambayeva daha sonra sərbəst buraxılıb.
“Kadırbek Atambayev, Qırğızıstanın Milli Təhlükəsizlik Dövlət Komitəsinin Dövlət Mühafizə Xidmətinin keçmiş rəisi Damir Musakeev, “Sosial-Demokratlar” partiyasının lideri Temirlan Sultanbekov, Qırğızıstan parlamentinin keçmiş deputatları Şaylobek Atazov və Kubanıçbek Kadırov saxlanılıblar. Saxlanılanlar respublikada keçiriləcək parlament seçkilərinin nəticələri elan edildikdən sonra kütləvi narazılıq görüntüsü altında silsilə mitinqlər təşkil etməyi planlaşdırıblar”, – DİN-in məlumatında deyilir.
Qeyd edək ki, noyabrın 22-də Qırğızıstanda bir neçə siyasətçi, onların qohumları və media xadimlərinə qarşı bir sıra axtarışlar, həbslər və dindirilmələr olub. Bütün əməliyyatlar Qırğızıstan Cinayət Məcəlləsinin 278-ci maddəsi (“Kütləvi iğtişaşlar”) əsasında həyata keçirilib.
