Türkiyənin xarici işlər naziri Hakan Fidan Ankarada Azərbaycan Prezidentinin xüsusi tapşırıqlar üzrə nümayəndəsi Xələf Xələfov ilə görüşüb.
Görüş zamanı regional məsələlər və ikitərəfli münasibətlər müzakirə edilib.
Hazırda bu görüşü vacib edən hansı proseslər və mövzular var? Xələfovun missiyası və aldığı tapşırıq nədən ibarətdir?
Gündəm24.az Globalinfo.az-a istinadən xəbər verir ki, politoloq Elxan Şahinoğlu deyib ki, Şuşa Bəyannaməsi Azərbaycan–Türkiyə ittifaqını rəsmiləşdirdi və münasibətləri ən yüksək həddə çatdırdı:
“Bu bəyannamədən sonra iki ölkə arasında müxtəlif səviyyəli görüşlər keçirilir, məsləhətləşmələr aparılır, strateji qərarlar müzakirə edilir və qəbul olunur. Bu gün Azərbaycanla bağlı bir çox məsələ Türkiyə ilə məsləhətləşmələr çərçivəsində həll edilir.
Elxan Şahinoğlu
Hazırda əsas məsələ Bakı və İrəvan arasında sülh sazişinin imzalanması və nəqliyyat yollarının açılmasıdır. Türkiyə prosesləri yaxından izləyir və kommunikasiyaların bərpasında maraqlıdır. Bir müddət öncə Türkiyənin xarici işlər nazirinin müavini də Bakıda oldu və eyni mövzular Azərbaycanın xarici işlər naziri Ceyhun Bayramovla müzakirə edildi.
Hesab edirəm ki, Azərbaycan Prezidentinin xüsusi tapşırıqlar üzrə nümayəndəsi Xələf Xələfovun Türkiyəyə səfəri strateji məsələlərlə bağlıdır. Regionda proseslər tez-tez dəyişir, müttəfiqlər buna görə ortaq koordinasiya və strateji addımları müzakirə edirlər”.
