Bu gün Vəhdət Partiyasında sədr Adəm İsmayıl Bakuvinin iştirakı ilə fəal gənclərlə geniş tərkibli görüş keçirilib. Görüş partiyanın gənclərlə əməkdaşlıq strategiyasının yeni mərhələsinin elan edilməsi, elmi yanaşmanın və analitik düşüncənin siyasətə inteqrasiyasının gücləndirilməsi baxımından xüsusi əhəmiyyət daşıyıb. Tədbirdə gənclərin fikir, təşəbbüs və layihələrinin partiya gündəliyində daha aktiv şəkildə yer alması üçün mexanizmlər müzakirə olunub.
Partiyanın sədri Adəm İsmayıl Bakuvi çıxışında Azərbaycan gəncliyinin dövlətçilik üçün mühüm strateji qüvvə olduğunu vurğulayıb: “Bu gün bizim siyasətimizdə ən böyük kapital gənclərimizin elmi düşüncəsi, analitik yanaşması və inkişaf eşqidir. Vəhdət Partiyası gənclərin bütün təşəbbüslərini dəstəkləməyə hazırdır.” Sədr onu da qeyd edib ki, Vəhdət Partiyası gənclərlə birgə ölkənin ictimai-siyasi həyatında açıq, modern və innovativ müzakirə mühiti yaradılması istiqamətində fəaliyyətini gücləndirəcək.
Partiyanın Aparat rəhbəri Əbdülvahab Manafov çıxışında bölgələrdə gənclərlə aparılan işlərin genişləndirildiyini, yeni layihələrin həm sosial fəallığı, həm də elmi bilikləri artırmağa yönəldiyini qeyd edib. Gənclər Təşkilatının sədri Aynurə Ələkbərova mövcud layihələrin nəticələri və yaxın dövr üçün planlaşdırılan təşəbbüslər barədə məlumat verib. O bildirib ki, gənclərin elmi-analitik bacarıqlarını inkişaf etdirən seminarlar, debat proqramları və ekspert görüşləri genişləndiriləcək.
Tədbirdə çıxış edən gənc idmançı Zeynəb İbrahimova, karate məşqçisi İlqar Abdullazadə, gimnast Məryəm İbrahimova və həkim-cərrah Rəşad Quliyev gənclər üçün yaradılan şəraitin onların şəxsi inkişafına və fəaliyyət dairələrinə ciddi müsbət təsir göstərdiyini vurğulayıblar. Onlar bu platformanın gənclərin öz fikirlərini sərbəst ifadə etməsinə və yeni imkanlar qazanmasına şərait yaratdığını bildiriblər.
Yazar Kamran Orucov və dilçi alim Mətanət Xudiyeva isə milli kimlik, mədəni irs və maarifçilik mövzularında öz fikirlərini bölüşərək, gənclərin bu sahələrə aktiv şəkildə qoşulmasının cəmiyyət üçün böyük əhəmiyyət daşıdığını bildiriblər. Onlar qeyd ediblər ki, gənclərin intellektual və mədəni mühitdə mövqeyinin güclənməsi ölkənin ümumi ideoloji inkişafına mühüm töhfə verir.
Sonda Adəm İsmayıl Bakuvi gənclərlə əməkdaşlığın yeni mərhələsinin başlandığını bildirib və Vəhdət Partiyasında “Elmi Gənclər Klubu”nun təsis edildiyini rəsmi şəkildə elan edib. Klubun gəncləri elmi araşdırmalar, ictimai müzakirələr, analitik fəaliyyətlər və innovativ layihələr ətrafında birləşdirəcəyi vurğulanıb.
