Azərbaycan Qida Təhlükəsizliyi İnstitutunun (AQTİ) Daxili Nəzarət Departamentinin müdiri Cahangir Bayramov işdən çıxarılıb.
Gündəm24.az Globalinfo.az-a istinadən xəbər verir ki, daxil olan məlumata görə, buna səbəb Bayramovun AQTİ-nin İdarə Heyətinin sədri Əli Nəbiyevin qəzəbinə tuş gəlməsidir. Belə ki, rəhbərliyin özbaşına tələbləri ilə bağlı Ə.Nəbiyevlə C. Bayramov arasında mübahisə yaranıb. Bununla əlaqədar olaraq, Ə.Nəbiyevin əmri ilə C.Bayramov işdən kənarlaşdırılıb.
Məlumata görə, Ə.Nəbiyev 2023-cü il iyulun 21-də AQTİ-nin İdarə Heyətinin sədri təyin olunandan sonra bu qurumda işçilərin işdən çıxarılması kütləvi hal alıb.
İddia olunur ki, o, institutun peşəkar və təcrübəli əməkdaşlarını işdən çıxararaq, onların yerinə heç bir peşəkarlığa və təcrübəyə malik olmayan öz adamlarını gətirir.
Cahangir Bayramov
Bildirilir ki, Ə.Nəbiyev işdə heç bir nöqsanı olmayan, səhvə yol verməyən, lakin “xoşuna gəlməyən” əməkdaşlardan açıq şəkildə işdən çıxmalarını tələb edir. Əməkdaşlar bunun səbəbini soruşduqda, yaxud bu tələbə əməl etmədikdə, Ə.Nəbiyev və onun ətrafındakı şəxslər həmin əməkdaşlarla ciddi “məşğul olmağa” başlayırlar. Müxtəlif üsullarla onları işdən çıxmağa məcbur edirlər.
Gundem24.az xatırladır ki, bir müddət əvvəl Globalinfo.az AQTİ-nin İdarə Heyətinin sədrinin müavini Tamilla Əliyevanın vəzifəsindən azad olunması barədə məlumat yayıb. Bundan bir gün sonra isə Azərbaycan Respublikasının Qida Təhlükəsizliyi Agentliyi T. Əliyevanın qurumun Aparatında heyvan sağlamlığı və bioloji təhlükəsizlik məsələləri üzrə məsul vəzifəyə təyin edilməsinə dair məlumat açıqlayıb.
Onu da qeyd edək ki, AQTİ-nin İdarə Heyətinin sədri Ə. Nəbiyevin AQTA-nın sədri Qoşqar Təhməzlinin biznes ortağının oğlu olduğu bildirilir.
Əli Nəbiyev
Məsələ ilə bağlı Gundem24.az Globalinfo.az-ın məlumatına əsasən AQTA-ya sorğu ünvanlayıb.
Sorğumuza cavab olaraq bildirilib ki, Cahangir Bayramov öz istəyi ilə işdən ayrılıb:
“Azərbaycan Qida Təhlükəsizliyi İnstitutunun (AQTİ) Daxili Nəzarət Departamentinin müdiri Cahangir Bayramovun işdən çıxarılmasına dair mediada yayılan məlumat həqiqəti əks etdirmir. Qeyd edək ki, Cahangir Bayramov öz ərizəsi ilə işdən ayrılıb”.
