İstanbulda Böcek ailəsinin fosin qazından faciəvi şəkildə həlak olması dezinfeksiya zamanı istifadə edilən kimyəvi maddələrin təhlükəsini gündəmə gətirib.
Dezinfeksiya zamanı zəhərli maddələrin miqdarına necə nəzarət olunur? Otel və restoranlarda istifadə edilən kimyəvi maddələr necə hazırlanır? Obyektlərə hansı formada çatdırılır və tərkibi necə yoxlanılır?
Gündəm24.az Globalinfo.az-a istinadən xəbər verir ki, infeksionist Nahid Kərimli deyib ki, fosfin maddəsi dezinfeksiya məqsədi ilə istifadə olunan bəzi maddələrin, yəni dezinfektantların metabolitidir:
“Bu isə böyük ehtimalla dezinfeksiyanın peşəkar aparılmaması və ya kənd təsərrüfatında istifadə edilən dezinfektantların otel şəraitində tətbiqi ilə bağlı ola bilər. Ola bilər ki, Böcek ailəsi dezinfeksiya prosesindən dərhal sonra otel otağına daxil olub və nəticədə zəhərlənmə baş verib. Dezinfeksiya prosedurundan əvvəl istifadə olunacaq maddələrin tərkibi və miqdarı mütləq texniki təlimata uyğun olaraq ölçülməli, xüsusilə də hər preparat üçün müəyyən edilən maksimal təhlükəsiz konsentrasiyaya riayət edilməlidir. Bu prosesdə xüsusi ölçü cihazları aerozol meter və ya dozaj nəzarət aparatları məhlulun həddindən artıq tətbiq olunmasının qarşısını almağa kömək edir. Qapalı məkanlarda havalandırmanın vəziyyəti də önəmlidir, çünki zəif hava dövranı zəhərli hissəciklərin daha uzun müddət mühitdə qalmasına səbəb olur”.
Nahid Kərimli
Həkim bildirib ki, həşərat dərmanları tənəffüs yolu, dəri və selikli qişalar vasitəsilə bədənə daxil olur və müəyyən əlamətlər görülür:
“Əlamətlər adi zəhərlənmə halları ilə eynilik təşkil edir – baş ağrısı, başgicəllənmə, ürəkbulanma, qusma, huşun itməsi, ağır hallarda isə koma və ölüm mümkündür. Yüksək dozalı və təkrar nəfəs alınması isə sinir sisteminə təsir göstərir. Kimyəvi maddələrin uşaqlar, yaşlılar və xroniki xəstəlikləri olan şəxslər üçün riski daha yüksəkdir. Ona görə də dezinfeksiya öncəsi maddələrin miqdarının dəqiq hesablanması və sonrası mühitin yaxşı havalandırılması təhlükəsizliyin əsas şərtləridir. Bu qaydalara əməl olunması həm təsirli dezinfeksiya, həm də insan sağlamlığının qorunması baxımından həlledicidir”.
