“ATƏT-in Minsk Qrupu 30 ilə yaxın müddət ərzində Azərbaycanın işğal olunmuş torpaqları ilə bağlı heç bir əməli addım atmadı”.
Gündəm24.az Globalinfo.az-a istinadən xəbər verir ki, siyasi elmlər üzrə fəlsəfə doktoru, politoloq Şəbnəm Həsənova ATƏT-in Minsk Qrupunun ləğvi və bunun Ermənistan–Azərbaycan sülh danışıqlarına təsiri barədə danışarkən deyib.
Politoloq bildirib ki, Minsk Qrupu fəaliyyət profili və istiqamətinin məhz Qarabağ məsələsi üzərində qurulmasına baxmayaraq, heç bir ciddi nəticəyə nail olmadı:
“Həmin Qrupda fəaliyyət göstərən diplomatların bölgəyə turistik səfərlərindən başqa yaddaşımızda qalan heç nə yoxdur. Digər bütün məsələlər isə yaxşı yadımızdadır. Məhz, bu yaddaş üzərində formalaşan Azərbaycan dövləti və xalqı birgə atdığı addımlarla tarixə qovuşmuş həmin münaqişəni öz milli iradəsi hesabına həll etdi.
Bu gün artıq fərqli reallıqları yaşayırıq. Qarabağ yenidən qurulur, bərpa edilir və bizim zəfərimiz dünya tərəfindən tanınır. Münaqişəni də həll etmişik, Zəfərimizi də legitimləşdirmişik. Bütün bunların fonunda Azərbaycan Ermənistan qarşısında haqlı olaraq iki məsələ qaldırdı: ATƏT-in Minsk Qrupunun ləğvi və Ermənistan Konstitusiyasının dəyişdirilməsi. Proseslərə mərhələli şəkildə yanaşılır.
Qrupun ləğvi haqlı olaraq belə əsaslandırıldı ki, əgər artıq keçmiş münaqişə üzrə termin nə leksikonda, nə də reallıqda mövcud deyilsə, həmin münaqişənin həlli istiqamətində yaradılan hər hansı bir təsisata da ehtiyac yoxdur. Azərbaycan ardıcıl addımları və prinsipial qərarları ilə illərlə ümidlə gözlədiyimiz ATƏT-in Minsk Qrupunun faktiki olaraq siyasi səhnədən çıxmasına nail oldu”.
Şəbnəm Həsənova
Politoloq bildirib ki, sülh gündəliyi Azərbaycanın müəyyən etdiyi yol üzrə inkişaf edir:
“Burada sülh gündəliyinin diktə siyasətindən uzaq olduğunu xüsusilə vurğulamaq lazımdır. Əsas məsələ ondan ibarətdir ki, bu gündəlik xalqların birgə yaşamasına, həmçinin dövlətlərin iqtisadi dirçəldilməsinə xidmət edir.
O baxımdan, ATƏT-in Minsk Qrupunun ləğvi Azərbaycanın növbəti diplomatik uğuru və zəfəri kimi xarakterizə olunmalıdır. Bu, eyni zamanda onu göstərir ki, Azərbaycan Prezidenti İlham Əliyev həqiqətən də uzaqgörən siyasət yürüdür və atdığı addımlarla təkcə iki ölkə arasındakı düşmənçiliyi aradan qaldırmaqla regiona sülh gətirmir, bütövlükdə Cənubi Qafqazı aşan böyük bir coğrafiyada xalqların rifahının yaxşılaşmasına töhfə verir.
Proseslər cəmiyyətə endikcə qarşıda bizi çətin və heç də hamar olmayan bir dövr gözləyir. Bu baxımdan, xalq və cəmiyyət olaraq həm ritorikamıza, həm də atdığımız addımlara son dərəcə diqqətlə yanaşmalıyıq, sözlərimizdə həssas olmalıyıq. Müharibədən nə qədər uzağıqsa, sülhə bir o qədər yaxın olacağıq. Tarix unudulmamalıdır. Bununla yanaşı, həm addımlar, həm də ritorika konstruktiv meyillər üzərində qurulmalıdır”.
