Qərbi Azərbaycan İcmasının nümayəndələri ilə Türkiyə–Azərbaycan parlamentlərarası dostluq qrupunun üzvü Şamil Ayrım və Qərbi Azərbaycan İcması Ağsaqqallar Şurasının və Milli Məclisin Səhiyyə Komitəsinin sədri, millət vəkili Əhliman Əmiraslanov arasında ikitərəfli görüş keçirilib.
Görüşün əvvəlində tərəflər bir-birini salamlayaraq cari proseslər və konfransın məqsədləri barədə məlumat mübadiləsi aparıblar.
Şamil Ayrım Türkiyə–Azərbaycan əlaqələrinin son illərdə əldə etdiyi nəticələrdən danışaraq, parlamentlərarası dostluq qrupunun fəaliyyəti və qarşıdakı hədəfləri haqqında məlumat verib. O, ölkələr arasında strateji tərəfdaşlığın daha da dərinləşdirilməsinin vacibliyini vurğulayıb.
Söhbət zamanı Türkiyənin 2-ci Qarabağ müharibəsi dövründə Azərbaycana göstərdiyi siyasi və mənəvi dəstək xüsusi qeyd olunub. Bildirilib ki, bu əməkdaşlıq həm regional təhlükəsizlik, həm də beynəlxalq platformalarda birgə fəaliyyət baxımından mühüm əhəmiyyət kəsb edir.
Tərəflər, eyni zamanda, Azərbaycan–Türkiyə dostluq qrupunun Avropa və Asiya regionlarında belə görüşlərin keçirilməsi üçün mühüm mexanizm olduğunu qeyd ediblər.
Müzakirələr zamanı Ermənistanın diaspora şəbəkələri vasitəsilə beynəlxalq aləmdə yaydığı dezinformasiya kampaniyalarına toxunulub. Azərbaycan tərəfi tarixi reallıqların və obyektiv həqiqətlərin məhz bu cür tədbirlər və bilgiləndirmə platformaları vasitəsilə dünya ictimaiyyətinə çatdırılmasının vacibliyini vurğulayıb.
Görüş səmərəli fikir mübadiləsi ilə davam edib.
