Dekabrın 9-da Xətai rayon İcra Hakimiyyətində Fövqəladə Hallar Nazirliyinin Bakı Regional Mərkəzi ilə birgə “Xətai rayonunda 2025-ci ildə mülki müdafiə sahəsində görülmüş işlərin yekunları və 2026-cı ildə qarşıda duran vəzifələr” və “Yanğın təhlükəsizliyinin təmin olunmasında Fövqəladə Hallar Nazirliyi, yerli icra hakimiyyəti və özünüidarəetmə orqanlarının birgə fəaliyyəti” mövzularında rayon müşavirəsi keçirilib.
Gündəm24.az bildirir ki, müşavirədə Xətai rayon İcra Hakimiyyətinin başçısı Rafiq Quluyev, FHN Bakı Regional Mərkəzinin rəisi, polkovnik Elnur Məhərrəmov, FHN Bakı Regional Mərkəzinin və yerli özünüidarəetmə orqanlarının nümayəndələri, rayonun təsərrüfat və xidmət sahələrinin, səhiyyə və təhsil ocaqlarının, idarə, müəssisə və təşkilatların rəhbərləri iştirak ediblər.
Müşavirədə rayon ərazisində mülki müdafiə işinin mövcud vəziyyəti, yanğın təhlükəsizliyinin təmin olunması və bu sahədə potensial risklərin müəyyən edilərək qabaqlayıcı tədbirlərin görülməsi müzakirə edilib.
Həmçinin, rayonda enerji təchizatı və qaz təsərrüfatında, həmçinin yaşayış binalarında yanğın təhlükəsizliyinin vəziyyəti, mövcud problemlər və onların həlli yolları barədə məruzələr dinlənilib.
Müşavirədə, eyni zamanda, mülki müdafiə işinin təşkili ilə bağlı komissiya yaradılıb. Komissiyaya mülki müdafiə hazırlığının yoxlanılması və monitorinqlərin keçirilməsi tapşırılıb. Xüsusilə son zamanlar baş verən xoşagəlməz yanğın hadisələri nəzərə alınaraq bazarların, ticarət mərkəzlərinin, istehsalat müəssisələrinin, çoxmənzilli yaşayış binalarının balanssaxlayıcılarına yanğın təhlükəsizliyi ilə bağlı təxirəsalınmaz tədbirlərin görülməsi tapşırılıb.
