Tbilisidə keçirilən Uşaq Avroviziyası müsabiqəsində Azərbaycanın Ermənistana 3 bal verməsi, həmçinin Ermənistan parlamentinin spikeri Alen Simonyanın azərbaycanlı təmsilçi Yağmur Nəsrullayeva ilə görüşərək ona uğurlar arzulaması maraqlı situasiya yaradıb.
Bu qarşılıqlı jestlər siyasi arenada necə qiymətləndirilməlidir? Hazırda “musiqi diplomatiyası” iki ölkənin münasibətlərinin normallaşmasında nə dərəcədə rol oynayır?
Gündəm24.az Globalinfo.az-a istinadən xəbər verir ki,danışan politoloq Züriyə Qarayeva deyib ki, Simonyanın bu addımı ilk baxışdan sadə mədəni jest kimi görünsə də, siyasi kontekstdə daha geniş mənalar daşıyır:
“O, Ermənistanın Baş naziri Nikol Paşinyanın ən yaxın komanda üzvlərindən biridir və oradakı iştirakı təsadüfi addım kimi qiymətləndirilə bilməz. Ermənistan rəhbərliyi hazırda Qərblə yaxınlaşma xətti yürütməklə paralel şəkildə regionda gərginliyi azaltmağa çalışır. Bu fonda mədəni tədbirdə nümayiş etdirilən yumşaq jestlər bir növ “düşmənçilik ritorikasını yüngülləşdirmək”, ictimai rəydə daha konstruktiv imic formalaşdırmaq cəhdi kimi qəbul edilə bilər. Simonyanın davranışı həm də İrəvanın “mülki və humanitar sahələrdə qarşıdurma istəmirik” mesajı vermək üçün istifadə etdiyi alətdir, çünki yüksək səviyyəli rəsmilərin belə tədbirlərdə jest göstərməsi siyasi risk daşıyır və bu, düşünülmüş diplomatik siqnal kimi görünür”.
Züriyə Qarayeva
Politoloq qeyd edib ki, Azərbaycanla Ermənistan arasında uzun illər “musiqi diplomatiyası” və mədəni jest mövcud olmayıb:
“Qarabağ münaqişəsi müddətincə mədəniyyət sahəsi də siyasətlə sərt şəkildə çərçivələndiyindən iki xalq arasında emosional məsafə daha da dərinləşib. Lakin hazırkı mərhələdə, xüsusilə 2023–2024-cü ildən sonra regionda sülh gündəmi daha ciddi müzakirə olunarkən, mədəniyyət vasitəsilə yumşalma və humanitar təmasların artırılması siyasi prosesləri dolaylı şəkildə dəstəkləyən alətə çevrilə bilər.
“Musiqi diplomatiyası” tərəflər arasında siyasi danışıqlara təsir edən əsas faktor olmasa da, neqativ emosional fonu azaltmaq, cəmiyyətləri psixoloji olaraq toqquşma rejimindən çıxarmaq və normallaşmaya hazırlamaq baxımından yumşaldıcı rol oynaya bilər. Buna görə də Simonyanın jesti real siyasi qərarların yerini tutmasa da, Ermənistanın ictimai-siyasi mühitdə “möhkəm düşmənçilik ritorikası”nı yüngülləşdirməyə yönəlik simvolik addımı kimi dəyərləndirilir”.
