2025-ci il Azərbaycanın çoxəsrlik dövlətçilik salnaməsinə qızıl hərflərlə “Konstitusiya və Suverenlik İli” kimi daxil olarkən, Prezident İlham Əliyevin Milli Məclisə təqdim etdiyi genişmiqyaslı Amnistiya Aktı layihəsi bu tarixi dönəmin mənəvi tacı, dövlətçilik təfəkkürümüzün ali zirvəsi oldu. Bu təşəbbüs sadəcə bir hüquqi prosedur və ya növbəti amnistiya qərarı deyil; bu, ərazi bütövlüyünü tam bərpa etmiş, suverenliyini qətiyyətlə təmin etmiş qüdrətli bir dövlətin öz vətəndaşına, insan taleyinə və milli barışığa verdiyi ən yüksək dəyərin təzahürüdür. Layihənin 20 mindən artıq şəxsi əhatə etməsi onu müstəqillik tariximizin ən böyük humanist missiyasına çevirərək, Azərbaycanın “Güclü dövlət – humanist lider” modelini bütün dünyaya nümayiş etdirir.
Cənab Prezident İlham Əliyevin son iki onillikdəki siyasi fəaliyyətini təhlil etdikdə, onun dövlət idarəçiliyinin mərkəzində hər zaman insan amilinin və milli maraqların sarsılmaz vəhdətinin dayandığını görmək mümkündür. 2003-cü ildən etibarən cənab Prezidentin rəhbərliyi ilə Azərbaycan həm iqtisadi, həm hərbi, həm də diplomatik sahədə titanik bir tərəqqi yolu keçmişdir. Lakin bu maddi güc və beynəlxalq nüfuz hər zaman daxili mənəvi dəyərlərlə, xalqla liderin polad birliyi ilə tamamlanmışdır. İlham Əliyev siyasəti Azərbaycanı regional gücdən qlobal proseslərə təsir edən strateji mərkəzə çevirərkən, heç vaxt “insan kapitalı” faktorunu arxa plana keçirməmişdir. 44 günlük Vətən müharibəsində qazanılan möhtəşəm Zəfər və 2023-cü ilin antiterror tədbirləri ilə suverenliyin ölkənin hər bir qarışında bərpa edilməsi, dövlət başçısının strateji dühasının nəticəsidir. Məhz belə bir qüdrət zirvəsində cənab Prezidentin amnistiya təşəbbüsü ilə çıxış etməsi, qalib bir sərkərdənin həm də rəhmdil, uzaqgörən və öz xalqının hər bir fərdini düşünən bir dövlət xadimi olduğunun ən bariz sübutudur. Bu, mahiyyət etibarilə “Qələbənin mərhəmət dərsi”dir; çünki həqiqi dövlət gücü yalnız düşməni daxili və xarici cəbhələrdə məğlub etmək deyil, həm də öz daxilində səhv etmiş vətəndaşını bağışlamaq, onu yenidən cəmiyyətə qazandırmaq və ona yeni bir həyat şansı vermək iqtidarında olmaqdır.
Bu Amnistiya Aktının hədəf kütləsi və əhatə dairəsi dövlətin sosial-siyasi prioritetlərini aydın şəkildə ortaya qoyur. Layihədə Vətən müharibəsinin və antiterror əməliyyatlarının iştirakçılarına, şəhid və qazi ailələrinin üzvlərinə xüsusi yer verilməsi dövlətin öz qəhrəmanlarına və onların ocaqlarına olan tükənməz ehtiramının göstəricisidir. Bu addımla dövlət bəyan edir ki, Azərbaycanın suverenliyi uğrunda can qoyan, sağlamlığını itirən hər bir kəs və onların yaxınları dövlətin hər zaman ali diqqət və qayğı mərkəzindədir. Bununla yanaşı, amnistiyanın qadınlara, 60 yaşı tamam olmuş ağsaqqallara, fiziki məhdudiyyətli şəxslərə və cinayət törədərkən yetkinlik yaşına çatmayanlara şamil edilməsi cəmiyyətin təməli olan ailə institutuna verilən ən böyük mənəvi dəstəkdir. Bu, minlərlə ailənin yenidən bütövləşməsi, minlərlə ocağa bayram sevincinin daxil olması deməkdir. Prezidentin bu siyasəti göstərir ki, Azərbaycan dövləti üçün qanunun aliliyi qədər, insanın sosial reabilitasiyası və ailə xoşbəxtliyi də müqəddəsdir.
Cənab Prezidentin siyasi iradəsi ilə gerçəkləşən bu genişmiqyaslı addım həm də Azərbaycanın hüquq sistemində dərin islahatların və cəza siyasətinin liberallaşdırılmasının məntiqi nəticəsidir. Böyük ictimai təhlükə törətməyən və ya ehtiyatsızlıqdan cinayət törətmiş şəxslərin azadlığa qovuşması, dövlətin “cəzalandırmaq deyil, islah etmək və cəmiyyətə qazandırmaq” fəlsəfəsinin üstünlük təşkil etdiyini göstərir. Bu yanaşma cəmiyyətdə daxili sabitliyi, qarşılıqlı etimadı və milli vəhdəti daha da sarsılmaz edir. Prezident İlham Əliyevin rəhbərliyi altında Azərbaycan, “Müstəqillik, Suverenlik və İnsanpərvərlik” üçlüyü üzərində öz yeni dövrünü qurur. Bu siyasət ölkəmizin beynəlxalq arenada demokratik dəyərlərə sadiq, müasir, sivil və humanitar prinsipləri hər şeydən üstün tutan dövlət imicini daha da yüksəklərə qaldırır.
Cənab Prezident İlham Əliyevin ümumi siyasi fəaliyyətinin analizi göstərir ki, o, hər bir addımında Azərbaycanın gələcək onilliklərini planlaşdırır. Suverenliyin tam təmin edildiyi bir şəraitdə belə bir amnistiyanın elan olunması, ölkədəki neqativ izlərin silinməsinə, keçmişin yükündən azad olmağa və gələcəyə daha təmiz, daha pozitiv ruhla addımlamağa xidmət edir. Bu, dövlət başçısının cəmiyyət qarşısında qoyduğu böyük bir sülh və barışıq çağırışıdır. 20 mindən çox şəxsin bu prosesdən faydalanması Azərbaycanın sosial tarixində misli görünməmiş bir hadisə olmaqla, dövlət-vətəndaş münasibətlərində yeni, daha səmimi bir mərhələnin təməlini qoyur.
Nəticə etibarilə, bu tarixi Amnistiya Aktı cənab Prezidentin xalqına bəxş etdiyi ən dəyərli mənəvi töhfədir. Bu akt sübut edir ki, Azərbaycan dövləti öz gücünü yalnız hərbi arsenalından və iqtisadi resurslarından deyil, həm də xalqına olan sevgisindən və ədalətli idarəçiliyindən alır. 2025-ci il bu amnistiya ilə təkcə dövlət suverenliyinin deyil, həm də ali insanpərvərliyin, vicdanın və milli həmrəyliyin təntənə ili kimi yaddaşlara əbədi həkk olunacaqdır. Cənab İlham Əliyevin bu böyük humanizm addımı Azərbaycanın hər bir guşəsində, hər bir evində dövlətə olan inamı daha da artıracaq və ölkəmizi daha işıqlı, daha firavan gələcəyə daşıyacaqdır. Bu, hər bir vətəndaşın taleyinə qayğı ilə yanaşan Liderin öz xalqına bəxş etdiyi ən böyük ədalət manifestidir.
Əziz Ələkbərli,
Milli Məclisin deputatı,Qərbi Azərbacan İcması
İdarə Heyətinin sədri
