Böyrək sağlamlığı orqanizmin ümumi vəziyyəti üçün həlledici rol oynayır. Mütəxəssislər bildirir ki, gündəlik bəzi vərdişlər və qidalanma pozuntuları uzunmüddətli dövrdə ciddi böyrək xəstəliklərinə səbəb ola bilər.
Oxu24.com bildirir ki İlk olaraq qazlı içkilərin həddindən artıq qəbulu risk faktorları sırasındadır. Araşdırmalara görə, tez-tez qazlı içki qəbul edən insanlarda sidikdə zülal (protein) aşkarlanması halları daha çox müşahidə olunur ki, bu da böyrək zədələnməsinin erkən əlamətlərindən sayılır.
İkinci mühüm faktor siqaret istifadəsidir. Siqaret qan damarlarını daraldaraq böyrəklərə gedən qan dövranını zəiflədir və uzun müddətdə onların funksiyasını pozur.
Qidalanma çatışmazlıqları da risk yaradır. Xüsusilə B6 vitamini çatışmazlığı böyrək daşlarının yaranma ehtimalını artıra bilər. Eyni zamanda Maqnezium azlığı orqanizmdə kalsium balansını pozaraq daş əmələ gəlməsinə şərait yaradır.
Böyrək sağlamlığı üçün yuxu rejimi də vacib amillərdən biridir. Qeyri-kafi yuxu orqanizmin regenerasiya prosesini zəiflədir və böyrəklərin bərpasına mənfi təsir göstərir.
Su qəbulunun az olması da ciddi risk yaradır. Kifayət qədər maye qəbul edilmədikdə toksinlərin orqanizmdən atılması çətinləşir və böyrək funksiyası zəifləyir.
Nəhayət, sidiyin uzun müddət saxlanılması da zərərli vərdişlərdən hesab olunur. Bu hal böyrəklərdə təzyiqin artmasına və sidik yolları problemlərinə səbəb ola bilər.
Həkimlər vurğulayır ki, böyrək xəstəliklərinin qarşısını almaq üçün düzgün qidalanma, sağlam həyat tərzi və vaxtında tibbi müayinələr vacibdir.
