Novruz bayramı yaxınlaşdıqca paytaxtdan rayonlara üz tutanların sayı xeyli artır. Xüsusilə, tələbələr bayram günlərini ailələri ilə keçirmək üçün Bakını tərk edir və bu da onların gediş-gəliş xərclərini artırır. Bəs bayram günlərində tələbələrin rayonlara səfərini asanlaşdırmaq üçün avtobus və qatar biletlərində xüsusi güzəşt və ya endirimlərin tətbiqi mümkündürmü?
Mövzu ilə bağlı KONKRET.az-a açıqlama verən Milli Məclisin deputatı Fazil Mustafa bildirib ki, bayram günlərində tələbələr üçün nəqliyyatda güzəştlərin tətbiqi müsbət addım olar.
Deputatın sözlərinə görə, belə bir təşəbbüs tələbələr üçün həm maddi baxımdan dəstək, həm də bayram hədiyyəsi kimi qiymətləndirilə bilər:
“Bu güzəştlərin nəzərdə tutulması yaxşı olar. Tələbələr üçün bayram günlərində böyük bir hədiyyə kimi dəyərləndirilər. Bunun tərəfdarıyam. Müvafiq qurumlar bunu nəzərə ala bilər”.
Qeyd edək ki, Novruz ərəfəsində rayonlara sərnişin axınının artması səbəbindən avtobus və qatar biletlərinə tələbat da xeyli yüksəlir. Bu baxımdan tələbələr üçün mümkün güzəştlərin tətbiqi onların bayram səfərlərini daha əlçatan edər.
