Dövlət qulluğuna qəbul sistemi son illərdə rəqəmsallaşma istiqamətində ciddi dəyişikliklərə məruz qalır və Dövlət İmtahan Mərkəzi tərəfindən tətbiq edilən elektron imtahan modeli bu prosesin əsas elementlərindən birinə çevrilib. Mütəxəssislər hesab edir ki, texnologiyanın inkişafı və idarəetmədə şəffaflıq tələblərinin artması fonunda imtahan formatının daha da təkmilləşdirilməsi qaçılmazdır. Bu isə qiymətləndirmə mexanizmlərindən tutmuş mərhələlərin sayına və müsahibə prosesinə qədər bir sıra yenilikləri gündəmə gətirə bilər.
Bəs görəsən, yaxın gələcəkdə dövlət qulluğuna qəbul prosesinin formatında hansı dəyişikliklər ediləcək?
Mövzu ilə bağlı KONKRET.az-a açıqlama verən təhsil eksperti Elçin Əfəndi bildirib ki, Dövlət İmtahan Mərkəzi tərəfindən müxtəlif istiqamətlər üzrə imtahanlar artıq elektron qaydada təşkil olunur və bu model dövlət qulluğuna qəbul prosesində də tətbiq edilir.
“Qurumun əsas hədəfi növbəti mərhələdə bütün imtahanların tam elektron formata keçirilməsidir.
Dövlət qulluğuna qəbul imtahanlarında əsasən məntiq və qanunvericilik üzrə suallar təqdim olunur. Gələcəkdə bu istiqamətlər üzrə sual formatında yeniliklərin edilməsi mümkündür. Elektron imtahanların üstünlüklərindən biri namizədlərin nəticələri daha qısa müddətdə əldə etməsidir ki, bu da ümumi prosesin operativliyini artırır”, – deyə o, vurğulayıb.
E. Əfəndinin fikrincə, qarşıdakı dövrdə qiymətləndirmə üsullarında və tapşırıqların təqdimat formasında dəyişikliklər edilə bilər.
“Bu dəyişikliklər imtahan iştirakçılarının bilik və bacarıqlarının daha obyektiv qiymətləndirilməsinə xidmət edəcək.
Hər hansı yenilik tətbiq olunacağı halda, Dövlət İmtahan Mərkəzi əvvəlcədən ictimaiyyəti məlumatlandırmalı və yalnız bundan sonra yeni format üzrə imtahanların keçirilməsinə başlanılmalıdır”.
