Sumqayıt şəhəri, 1-ci mikrorayon, 4B/29 saylı binada aparılan işlər sakinlərin ciddi narazılığına səbəb olub.
Sakinlərin sözlərinə görə, su xətlərini binanın zirzəmisində tez-tez təmir etmək adı ilə, binanın aşağı hissəsində çoxsaylı deşiklər açılır. Divarın hörgü daşları sökülür və binanın özülünə yaxın ərazidə qazıntı işləri aparılır.
Ən ciddi sual isə budur: su xətti çəkmək üçün insanların yaşadığı binanın konstruksiyasını bu vəziyyətə salmaq nə dərəcədə doğrudur?
Gündəm24.az xəbər verir ki, əgər bu müdaxilələr layihə və müvafiq texniki tələblər əsasında aparılırsa, aidiyyəti qurumlar bunu ictimaiyyətə açıqlamalıdır. Əks halda, sakinlərin təhlükəsizliyini riskə atan belə işlərə kim və hansı əsasla icazə verib?
Burada söhbət adi təmir işindən getmir. Söhbət insanların yaşadığı binanın divarlarından və bünövrəyə yaxın konstruksiyalardan gedir.
Aidiyyəti qurumlar susmamalıdır. Binaya dərhal müstəqil mühəndis-texniki baxış keçirilməli, aparılan qazıntıların binanın dayanıqlığına təsiri müəyyənləşdirilməli və nəticələr sakinlərə açıqlanmalıdır. Bir su xəttinin çəkilməsi insanların həyat və təhlükəsizliyindən üstün ola bilməz!
Sakinlər haqlı olaraq soruşurlar: Bu işlər hansı layihə əsasında aparılır və binanın təhlükəsizliyinə kim cavabdeh olacaq?
Məsələ ilə bağlı Sumqayıt Şəhər Sukanal İdarəsinin rəhbərliyi ilə əlaqə saxlanılıb. İdarənin rəhbəri Xalid Quliyev bildirib ki, binanın su xətlərinin layihələndirilməsi ilə bağlı müvafiq müraciət olunub. Layihələndirmə işləri başa çatdıqdan sonra su xətləri binadan uzaqlaşdırılaraq kənara çəkiləcək.
Bildirilib ki, bu gün ərzində su xəttində yaranmış qəza da aradan qaldırılıb və binanın su təchizatı tamamilə bərpa olunub.
Əli Əliyev
Gündəm24.az
