ABŞ-ın Parisdəki səfiri Çarlz Kuşner Fransa Xarici İşlər Nazirliyinə çağırılarkən gəlməyib və bu da xarici işlər naziri Jan-Noel Barronun diplomata qarşı tədbir görməsinə səbəb olub.
Gündəm24.az Axar.az-a istinadən xəbər verir ki, bu barədə “Avropean Pravda” Parisdəki diplomatik mənbəyə istinadən məlumat yayıb.
“Fransanın xarici işlər naziri Barro ABŞ səfiri, eyni zamanda Prezident Donald Trampın qudası Çarlz Kuşneri fransız ifrat sağçı fəalı Kventin Derankın qətli ilə bağlı şərhlərinə görə çağırıb. Lakin o gəlməyib. Səfirin gəlməməsi səbəbindən Barro ABŞ diplomatına qarşı sanksiyalar tətbiq etmək qərarı verib. Nazir onun Fransa hökumətinin üzvləri ilə birbaşa əlaqəsinin dayandırılmasını əmr edib. Eyni zamanda, Kuşner öz missiyasını yerinə yetirməyə davam edəcək və fikir ayrılıqlarının həllinə yönəlmiş diplomatik mübadilələr üçün Xarici İşlər Nazirliyində çıxış edə biləcək”, – mənbə bildirib.
Qeyd edək ki, hadisə 12 fevralda Lionda baş verib. Burada solçu siyasətçiyə qarşı keçirilən etiraz aksiyası zamanı radikal solçu və ifrat sağçı fəallar arasında toqquşmalar baş verib. Toqquşma zamanı 23 yaşlı Derank ölümcül beyin zədəsi alıb. Ağ Ev hadisəni qətiyyətlə pisləyib və Derankın ölümünü terrorizm adlandırıb.
