İsrail Livanda qanlı əməliyyatları davam etdirir: Yüzlərlə ölü və yaralı var
İsrail ordusu (ÇAXAL) ABŞ və İran arasında əldə olunmuş atəşkəs razılaşmasına baxmayaraq, Livan ərazisinə endirdiyi zərbələrin miqyasını kəskin şəkildə artırıb. İsrail mediasının verdiyi məlumata görə, ötən gecə ərzində Livanın müxtəlif bölgələrinə 20-dən çox ağır hava zərbəsi endirilib.
Gündəm24.az xəbər verir ki, Livan Mülki Müdafiə Xidmətinin yaydığı son məlumatlara görə, Beyrut, Bekaa vadisi, Livan dağlıq bölgəsi, Sidon və ölkənin cənubundakı kəndlərə edilən hücumlar nəticəsində azı 254 nəfər həlak olub, 1165 nəfər isə müxtəlif dərəcəli xəsarətlər alıb. Hücumların intensivliyi paytaxt Beyrutun sıx məskunlaşdığı məhəllələrdə böyük dağıntılara və əhali arasında ciddi vahiməyə səbəb olub.
Livanın Baş naziri Nəvaf Salam İsrailin bu amansız hücumları nəticəsində həyatını itirənlərin xatirəsini ehtiramla yad etmək məqsədilə 9 aprel tarixini ölkədə ümummilli matəm günü elan edib. Baş nazir beynəlxalq birliyi İsrailin hərbi maşınını dayandırmaq üçün təcili addımlar atmağa çağırıb. İsrail Müdafiə Ordusu isə hədəflərin yalnız “Hizbullah”a məxsus hərbi obyektlər olduğunu iddia etsə də, beynəlxalq müşahidəçilər mülki infrastrukturun və dinc sakinlərin ciddi zərər gördüyünü vurğulayırlar./NOCOMMENT.az/
