Donald Tramp İrandan sonra Kubanı da ABŞ-nin təsir dairəsinə salmaq niyyətində olduğunu açıqlayıb. Bu açıqlamalar fonunda Vaşinqtonun xarici siyasət prioritetlərinin qarşıdakı dövrdə daha sərt və genişmiqyaslı olacağı gözlənilir. Hazırda bir çox proqnozlarda İranla mümkün münaqişənin gözləniləndən daha uzun müddət davam edə biləcəyi qeyd olunur.
Əgər İranla münaqişə uzanarsa və bu, ABŞ-ni həm iqtisadi, həm də hərbi baxımdan yorarsa, o zaman Kubaya və digər ölkələrə yönəlmiş planlar təxirə salına bilərmi?
Sfera.az-a mövzu ilə bağlı açıqlama verən siyasi şərhçi Şakir Ağayev bildirib ki, Tramp hələ əvvəldən öz proqnozlarını bölüşərək, öncə Venesuelada, sonra isə İran və Kubada rejimləri dəyişəcəyini bəyan edib:
“Amma əgər vəziyyət Tramp administrasiyasının proqnozlaşdırdığı kimi alınmasa, yəni müharibə uzun çəkərsə, təbii ki, Kubanın ram edilməsi və Amerikaya tabe etdirilməsi ləngiyə bilər, yaxud ümumiyyətlə gündəmdən çıxa bilər. Xarici mənbələrin məlumatına əsasən, müharibə sentyabr ayına qədər uzana bilər. Belə bir halda ABŞ-nin hərbi gücünü bir neçə istiqamətə bölməsi çətin olacaq. Çünki İranla mübarizə zamanı silah çatışmazlığı da yarana bilər”.
Ekspert qeyd edib ki, İranla müharibə əslində ABŞ üçün iqtisadi baxımdan olduqca zərərlidir:
“Müharibə Amerikanın yaxınlığında getmir. İstifadə olunan silahların bu bölgəyə çatdırılması həm böyük məsafə, həm də uzun vaxt tələb edir ki, bu da xərcləri kəskin artırır. Eyni zamanda, əgər İranla müharibə uzanarsa, dünyanın enerji sistemində də ciddi problemlər yarana bilər. Neft, qaz və digər sənaye sahələrində mənfi təsirlər hiss olunacaq. Ona görə də Kuba ilə bağlı məsələ hələlik təxirə salına bilər və yaxın müddətdə
gündəmdən çıxacağı gözlənilir”.
