Rusiya ordusunun Kiyev şəhərinə hücum nəticəsində 11 nəfər xəsarət alıb, yaralılar arasında iki uşaq var.
Gündəm24.az APA-ya istinadən xəbər verir ki, bu barədə “Unian“ məlumat yayıb.
Şəhərin bir neçə rayonunda dağıntılar qeydə alınıb, yaşayış binalarında və mülki obyektlərdə yanğınlar baş verib.
Kiyev meri Vitali Kliçkonun verdiyi məlumata görə, hücumdan sonra paytaxtın təxminən üçdə birinin istilik təchizatı kəsilib, sol sahilin bəzi ərazilərində elektrik enerjisinin verilişi dayandırılıb.
Kiyev vilayətində isə hücum nəticəsində bir qadın həlak olub, bir neçə nəfər ağır vəziyyətdə xəstəxanaya yerləşdirilib. Hadisə ilə bağlı xilasetmə işləri davam etdirilir.
10:05
Rusiya gecə boyu Ukraynaya dronlar və ballistik raketlərlə hücum edərək Kiyevdə və ətraf bölgədə xəsarətlərə və dağıntılara səbəb olub.
Gündəm24.az APA-ya istinadən xəbər verir ki, Kiyev meri Vitali Kliçkonun bildirdiyinə görə, hazırda dörd zərərçəkən tibbi yardıma müraciət edib, onlardan üçü xəstəxanaya yerləşdirilib. Bir qədər sonra o, zərərçəkənlərin sayının 5-ə çatdığını açıqlayıb.
Kiyevin Qoloseyevski rayonunda yanğın baş verib. İlkin məlumata görə, yanğın avtomobillərə texniki xidmət stansiyasında (STO) qeydə alınıb. Obuxov rayonunda icmalardan birinə məxsus kommunal müəssisənin binası zədələnib. Desnyanski rayonunda da açıq əraziyə dağıntı qalıqlarının düşdüyü bildirilir.
Kiyev vilayət Dövlət Administrasiyasından verilən məlumata görə, Rusiya məqsədli şəkildə kritik infrastruktur obyektlərini və yaşayış evlərini hədəfə alıb. Hücum nəticəsində bir nəfər yaralanıb.
Belə ki, hücum zamanı yük avtomobilini idarə edən İvano-Frankivsk vilayətinin sakini bel nahiyəsindən qəlpə yaraları alıb. Yaralı yerli xəstəxanaya yerləşdirilib.
Eyni zamanda, Vışqorod şəhərində çoxmərtəbəli binanın pəncərələri zədələnib. Digər vilayətlərdə də dağıntılar qeydə alınıb.
Borispol rayonunda istehsal müəssisəsinin binalarına və iki avtomobilə ziyan dəyib. Buça rayonunda tikinti sahəsinin ərazisində yanğın baş verib. Obuxov rayonunda isə icmalardan birinə məxsus kommunal müəssisənin binası zədələnib. Hücumlar davam edir. Monitorinq mənbələrinin məlumatına görə, paytaxta doğru təxminən 70 pilotsuz uçuş aparatı hərəkət edir.
