“Yayılan videolar həqiqəti əks etdirir. Bəli, həmin toyda olmuşuq. Toyu mən danışmışdım və bu məsələ ilə bağlı əlaqə saxladığım şəxs bəyin atası Hasil bəy idi”.
Gündəm24.az bildirir ki, bunu Demokrat.az-a açıqlamasında müğənni Nəsimi Məmmədovun prodüseri Azər deyib.
O bildirib ki, bəzi iddialara görə, toyda bir çox müğənni iştirak edib, lakin bu məlumat doğru deyil:
“Tədbirdə Xalq artisti Aygün Kazımova, toyu idarə edənlər – müğənni Nəsimi Məmmədov və aparıcı Nanə Ağamalıyeva olub. Həmin toyda nə Razi Nurullayevi gördük, nə də ona əmi kimi söz verildiyinin şahidi olduq. Açığı sonradan özümüzə də maraqlı oldu ki, necə olur ki, toyda Razi Nurullayev yox idi. Biz yalnız bəyin atası Hasil Nurullayevi tanıyırıq. O, Sankt-Peterburqda daşınmaz əmlak və tikinti sahəsində biznes fəaliyyəti ilə məşğuldur”.
Xatırladaq ki, ötən gün Dubayın məşhur “The Ritz-Carlton” hotelində keçirilən toy mərasimi Milli Məclisin deputat Razi Nurullayevin qardaşı, tikinti maqnatı kimi tanınan Hasil Nurullayev tərəfindən təşkil edilib. Toy yüksək səviyyədə və olduqca dəbdəbəli şəkildə keçib.
