Türkiyənin Təhsil Nazirliyi müəllimlərlə bağlı daxil olan çoxsaylı şikayətlərdən sonra araşdırmalara başlayıb.
Gündəm24.az “Qafqazinfo”ya istinadən xəbər verir ki, araşdırma şagirdlərlə çəkdikləri videoları sosial şəbəkələrdə paylaşaraq məşhurlaşan müəllimlərlə bağlıdır.
Nazirlik 81 vilayətdən çoxsaylı izləyicisi olan müəllimlərin adları, işlədikləri məktəblər, istifadə etdikləri sosial media platformaları və istifadəçi adları haqqında məlumatların göndərilməsini tələb edib. Bildirilib ki, məqsəd müəllimlərin sosial mediadan istifadəsini əngəlləmək deyil, məktəb və sinif mühitində çəkdikləri videoların istifadəsinin və məktəblərin daxili konfidensiallığının pozulmasının qarşısını almaqdır.
Məlumata görə, sözügedən müəllimlərə qarşı xəbərdarlıqdan işdən çıxarmağa qədər müxtəlif cəzalar tətbiq oluna bilər.
Qeyd edək ki, bir neçə gün öncə Türkiyədə çalışan azərbaycanlı ingilis dili müəllimi Səma İbrahimovanın dərs zamanı geyindiyi geyim sosial şəbəkələrdə müzakirələrə səbəb olub.
S.İbrahimovanın paylaşdığı videonu izləyən bəzi istifadəçilər müəllimin geyiminin normal olduğunu bildirsələr də, digərləri belə geyimdə dərs keçməyin düzgün olmadığını vurğulayıb. Onlar paylaşıma “Bu biabırçılığa baxın, gecəlikdə dərsə gəlib”, “İnsan öz peşəsinə dəyər verməlidir”, “Məktəb rəhbərliyi buna necə icazə verib?”, – kimi şərhlər yazıblar. Narazılıq ifadə edən istifadəçilərin bir qismi Türkiyənin təhsil naziri Yusuf Tekinin adını “tag” edərək məsələ ilə bağlı tədbir görməyə çağırıblar.
