Bu gün Bakı Ağır Cinayətlər Məhkəməsində hakim Aytən Əliyevanın sədrliyi ilə Məhərrəm Hüseynzadənin cinayət işi üzrə məhkəmə prosesi keçirilib.
Gündəm24.az Lent.az-a istinadən xəbər verir ki, məhkəmə şahid ifadələri ilə davam edib.
Şahid Aybəniz Hüseynova həmin gün kürəkəninin onlara gəldiyini bildirdi:
“Gözləri qıpqırmızı idi, salamlaşmamış Ayseli çağırdı. Yoldaşım gələnə kimi evə girmədi, nə qədər dedik inadından dönmədi. Başladı qapıları döyməyə ki, ay qonşular, uşaqlarımı mənə vermirlər. Yoldaşımla bunu sakitləşdirə bilmirdik, o tərəfə, bu tərəfə qaçıb qonşuların qapılarını yumruqlayırdı. Oğluma zəng elədim, gəldi. Məhərrəm onu min qılıqla evə apardı ki, uşaqlarını görsün. Keçib uşaqlara baxıb sonra oğlumla birlikdə çıxdı. Nə qədər dedik qalmağa razılaşmadı, getdi. Mən istəmirdim ki, Məhərrəm Zəhmətlə tək getsin. Sonra yoldaşım gəldi dedi ki, Zəhmət özünü yandırıb. O gedən kimi Məhərrəm gəldi, yoldaşımı soruşdu, dedim paltarları verdim, aparıb getdi”.
Şahid Aysel Əhmədova yoldaşı və qaynanası ilə olan mübahisədən sonra atasının evinə getdiyini dedi:
“Yoldaşıma dedim ki, bu evdə qala bilmərik. Ya atamgildə müvəqqəti qalaq ya da kirayə ev tutaq. Yoldaşım da dedi ki, mən bu evdən çıxmaram, evdə haqqım var, tikintisi üçün kreditə pul götürmüşəm. Yoldaşım banka borcu olduğuna görə axtarışda idi. Mən atamgilə getdim, o gəlmək istəmirdi. Uşaqları görmək üçün hər gün gələ biləcəyini demişdim Zəhmətə. Həmin gün qapı döyüldü, anam açdı qapını. Yoldaşım da qışqıraraq məni çağırmağını tələb elədi. Mən içəridən çıxa bilmirdim deyə çöldə baş verənləri görmədim, sonra qardaşım Zəhmətin özünü yandırdığını xəbər elədi”.
Şahid Fərid Xəlilov Fərid hadisənin şahidi olmasa da sonradan gələndə yanmış vəziyyətdə olan adamı gördüyünü bildirdi:
“Yandım, yandım, həkim çağırın mənə, deyə qışqırırdı. Paltarlarını soyuna-soyuna çənlərə tərəf qaçdı. Mən tez mühafizəni köməyə çağırdım, həkimləri gözləməyə başladıq”.
Şahid Allahverdi Ələsgərov həmin gün ev qapısının qonşusunun kürəkəni tərəfindən şiddətlə döyüldüyünü dedi:
“Zəhmət uşaqlarının öldürüldüyünü, ondan gizlətdiklərini deyib qışqırırdı. Məhərrəm gələndən sonra onu sakitləşdirib evinə aparmaq istəyirdi, israr edirdi ki, ancaq onunla gedəcək. Sonra Məhərrəm gələrək onun özünü yandırdığını dedi”.
Məhkəmə qalan iki şahidin məcburi qaydada gətirilməsi barədə qərar verdi.
Növbəti proses dekabrın 8-nə təyin olunub.
Xatırladaq ki, Məhərrəm Hüseynzadə 2025-ci ilin may ayının 29-u, gecə saat 1 radələrində ailə üzvləri ilə birlikdə yaşadıqları Nizami rayonu, Fərzəliyev küçəsi 2 ünvanında olan zaman, bacısının keçmiş əri Zəhmət Əhmədov sərxoş halda ora gələrək, səs-küy yaradıb. Bina sakinlərini narahat etməməsi üçün Məhərrəm onu oradan uzaqlaşdırmaq məqsədi ilə BMW markalı avtomobilə əyləşdirib. Yolda aralarında yaranmış sözlü mübahisə zamanı, Zəhmət Əhmədovun söyüşlərindən hiddətlənərək maşını yanacaq doldurma məntəqəsinə sürüb. 1 litrlik plastik qaba yanacaq dolduran Məhərrəm Hüseynzadə onu Zəhmət Əhmədovun üzərinə töküb və od vurub. Zərərçəkən bir gündən sonra müalicə aldığı Nərimanov Tibb Mərkəzinin yanıq şöbəsində vəfat edib. Məhərrrəm Hüseynzadə həbs olunub, ona qarşı CM-nin 120.2.4. (qəsdən adam öldürmə – xüsusi amansızlıqla və ya ümumi təhlükəli üsulla adam öldürmə) maddəsi ilə ittiham irəli sürülüb.
