Azərbaycan Mərkəzi Bankı 9AMB) səhmdar cəmiyyətlərinə illik hesabatların hazırlanması, təqdim olunması və açıqlanması ilə bağlı qanunvericiliyin tələbləri ilə bağlı xəbərdarlıq edib.
Gündəm24.az xəbər verir ki, bu bu barədə AMB məlumat yayıb.
Bildirilib ki, “Qiymətli kağızlar bazarı haqqında” Qanuna müvafiq olaraq səhmdar cəmiyyətinin illik hesabatı hər başa çatmış təqvim ilinin nəticələri üzrə hazırlanaraq (qanunvericilikdə nəzərdə tutulmuş hallar istisna olmaqla) onun səhmdarlarının ümumi yığıncağı tərəfindən təsdiq edilir: “Hesabatlar həmin tarixdən etibarən on iş günündən gec olmayaraq Azərbaycan Respublikasının Mərkəzi Bankına təqdim olunur. Mərkəzi Bank tərəfindən hesabatın açıqlanmasının dayandırılması haqqında göstəriş verilmədikdəsəhmdar cəmiyyəti təqdim etdiyi tarixdən etibarən otuz təqvim günü ərzində illik hesabatını öz internet səhifəsində (olduqda) və mediada açıqlanmasını təmin etməlidir”.
AMB vurğulayıb ki, qanunvericiliyin tələblərinə əsasən emitentlərin illik hesabatında idarəetmə hesabatı, maliyyə hesabatları və onun yoxlanılması üzrə kənar auditor rəyi (mikro və kiçik sahibkarlıq subyektləri istisna olmaqla) öz əksini tapmalıdır: “Səhmdar cəmiyyətləri cari il üzrə sahibkarlıq fəaliyyətini dayandırdığı halda bu barədə səhmdar cəmiyyətinin ümumi yığıncağının qərarı və Vergi Məcəlləsinin 16.3-cü maddəsinə uyğun olaraq Dövlət Vergi Xidmətinə təqdim edilmiş arayış əlavə olunmaqla Mərkəzi Banka məlumat verilməsi tövsiyə olunur”.
Emitentlərin nəzərinə çatdırılır ki, qanunvericiliklə nəzərdə tutulmuş müddət ərzində illik hesabatlarını təqdim etməyən səhmdar cəmiyyətlərinə Mərkəzi Bank tərəfindən xəbərdarlıq məktubları göndərilir.
“Sözügedən illik hesabtların Mərkəzi Banka təqdim edilməsi və açıqlanması təmin olunmadıqda qeyd olunan hərəkətsizliyə (qanun pozuntusuna) görə emitentlər İnzibati Xətalar Məcəlləsi ilə müəyyən olunmuş qaydada inzibati məsuliyyətə cəlb olunur. Qeyd olunanlar nəzərə alınaraq səhmdar cəmiyyətləri tərəfindən qanunvericiliyin tələblərinə əməl olunmalıdır.
Mövzu ilə bağlı əlavə suallar yarandığı təqdirdə Mərkəzi Bankın 966 “Çağrı Mərkəzi” ilə əlaqə saxlanıla bilər”, – məlumatda qeyd edilib./kredit.az
