İranın Gömrük İdarəsinin məlumatına görə, ölkə bazarında qiymətləri tənzimləmək məqsədilə yumurta, kartof, pomidor və xurmanın ixracı dayandırılıb. Bu ölkədən Azərbaycana adətən portağal, kərə yağı, duz və digər məhsullar idxal olunurdu.
İranda bahalaşma fonunda yerli bazarda qıtlıq, bahalaşma gözlənilirmi?
Globalinfo.az-a danışan iqtisadçı Emin Qəribli deyib ki, həmin məhsullar dünya bazarında geniş yayılıb və ixrac edən ölkələr çoxdur:
“O məhsullar üzrə ixtisaslaşmış və ixrac edən ölkələr kifayət qədərdir. Buna görə də düşünmürəm ki, portağal, kərə yağı və ya duz kimi məhsulların alternativ mənbələrdən təmin edilməsində problem yaransın. Müəyyən qədər uzaq ölkələrdən idxal mümkündür. Bu isə daşınma xərclərinə görə cüzi qiymət artımına səbəb ola bilər. Lakin ümumilikdə əsas ərzaq məhsullarının dünya bazarındakı qiymətləri təxminən eynidir və logistika xərclərindəki fərq ciddi bahalaşmaya gətirib çıxarmaz”.
İqtisadçı qısamüddətli təminat çətinliyinin mümkünlüyünü də istisna etməyib:
“Qısamüddətli dövrdə bazar ilkin reaksiyanı verə bilər. Müvəqqəti olaraq təminatla bağlı müəyyən çətinlik istisna edilmir. Lakin alternativ mənbələr məlumdur və uzunmüddətli perspektivdə ciddi problem gözlənilmir. Məsələn, biz buğdanın müəyyən faizini Ukraynadan alırdıq və həmin istiqamətdə yaranan çətinlikləri də aradan qaldıra bildik. Digər sadalanan məhsullar üzrə də ciddi risk görmürəm”.
