Ermənistan parlamentinin sədri Cenevrədən qayıtdıqdan sonra jurnalistlərə açıqlama verərək Azərbaycanla dialoqun davam etdirilməsinə hazır olduğunu bildirib. Lakin qarşılıqlı səfərlərin reallaşması üçün Azərbaycanda saxlanılan ermənilərlə bağlı məsələnin həll olunmasının vacib olduğunu vurğulayıb.
Gündəm24.az xəbər verir ki, Simonyan bildirib ki, bəzi beynəlxalq formatlar çərçivəsində Azərbaycan prezidenti ölkəmizə gələ, ölkəmizin rəhbəri isə Bakıya səfər edə bilər. Mən də ora gedə bilərəm. Amma məhbusların varlığını bilə-bilə səfərə getmək bizim üçün çətindir. Buna baxmayaraq, mən optimistəm.
Xəbərdə həmçinin qeyd olunur ki, Simonyan Cenevrədə Azərbaycan parlamentinin sədri Sahibə Qafarova ilə görüşərək Parlamentlərarası İttifaqın baş katibi Martin Çunqonqun iştirakı ilə qanunvericilik səviyyəsində etimadın möhkəmləndirilməsi tədbirlərini dəstəkləməyə hazır olduqlarını bəyan edib.
Elay RZAZADƏ,
Gündəm24.az
