İranın xarici işlər naziri Abbas Əraqçi çıxışında İsrailə verilən toxunulmazlığın beynəlxalq hüquqi nizamı zəiflətdiyini bildirib və sanksiyaların tətbiq olunmasına çağırıb.
Gündəm24.az xəbər verir ki, Sputnik Türkiye agentliyinin məlumatına görə, İranın xarici işlər naziri Abbas Əraqçi 17-ci Əl-Cəzirə Forumunda çıxış edərək İsrailin Fələstinə hücumlarının beynəlxalq hüquqa və regional sabitliyə mənfi təsir göstərdiyini vurğulayıb. O bildirib ki, İsrailə verilən toxunulmazlıq beynəlxalq hüququ zəiflədib və bu, regional ölkələrin hərbi, iqtisadi və sosial gücünü sarsıdır. Əraqçi İsrailə qarşı hərbi və ticarət sanksiyalarının zəruriliyini qeyd edib və Fələstinin strateji və mənəvi əhəmiyyətini xüsusi vurğulayıb.
Nazir həmçinin Qətərin paytaxtı Dohada keçirilən forum zamanı Yaxın Şərqdəki geosiyasi tarazlığın Qəzzadakı müharibədən sonra dəyişdiyini və əvvəlki qanunsuz işğal ilə müqayisədə vəziyyətin daha da ağırlaşdığını bildirib. O, İran və ABŞ arasında Omanda davam edən danışıqların hələlik konkret tarixinin olmadığını, İranın nüvə proqramının isə müzakirə mövzusu olmadığını əlavə edib.
Sədaqət Həsənova
