Belçika İsrailin işğal olunmuş Qərb Şəriyəsinin Fələstin tərəfindən idarə olunan ərazilərində “monitorinq və nəzarət fəaliyyətlərini” artırmaq qərarlarını pisləyib. Bəyanatda bu hərəkətlərin beynəlxalq hüququ pozduğu vurğulanıb.
Gündəm24.az xəbər verir ki, Belçikanın xarici işlər naziri və Baş nazirin müavini Maksim Prevot İsrailin Qərb Şəriyəsindəki son addımlarını sərt şəkildə tənqid edib. Prevot sosial mediada yayımladığı açıqlamada İsrailin qərarlarının beynəlxalq hüquqa və BMT Təhlükəsizlik Şurasının qətnamələrinə açıq şəkildə zidd olduğunu bildirib.
Nazir vurğulayıb ki, İsrailin işğal olunmuş Qərb Şəriyəsində nəzarəti gücləndirmək qərarları qəbuledilməzdir və davamlı sülh yalnız qanunun aliliyinə və qarşılıqlı hörmətə əsaslana bilər. O, bu addımların bölgədəki gərginliyi daha da dərinləşdirdiyini və sülh səylərini zəiflətdiyini qeyd edib.
Məlumata görə, İsrailin təhlükəsizlik kabineti fevralın 8-də Qərb Şəriyəsinin Fələstin tərəfindən idarə olunan hissələrində “nəzarət fəaliyyətlərini” genişləndirən qərarlar qəbul edib ki, bu da mümkün ilhaq riskləri ilə bağlı narahatlıq yaradıb. Xüsusilə Hebronda planlaşdırma və tikinti səlahiyyətlərinin yerli administrasiyadan İsrailin Mülki Administrasiyasına verilməsi 1997-ci il Hebron Sazişinə zidd hesab olunur.
Xatırladaq ki, 1995-ci il Oslo Sazişinə əsasən Qərb Şəriyə A, B və C zonalarına bölünür və C zonası ərazinin təxminən 61 faizini təşkil edərək tam İsrail nəzarəti altındadır.
Sədaqət Həsənova
