Suriya prezidenti Əhməd əl-Şaraa NBC News telekanalına müsahibəsində İŞİD və “Əl-Qaidə” ilə əlaqələrini niyə kəsdiyini izah edib.
Gündəm24.az xəbər verir ki, jurnalist dövlət başçısına sual verib ki, terror təşkilatlarını ideoloji səbəblərə görəmi tərk edib, yoxsa öz məqsədlərinə çatmaq üçünmü onlarla əməkdaşlıq edib.
“Əgər onlarla razılaşsaydım, onları tərk etməzdim”, – deyə Əhməd əl-Şaraa cavab verib.
Müsahibə zamanı jurnalist xatırladıb ki, ABŞ prezidenti Donald Tramp may ayında onunla görüşdən sonra Şaraanı “yaraşıqlı, keçmişi güclü və qətiyyətli insan” adlandırıb.
“Buna şübhə edirsiniz?” – Suriya lideri ironiya ilə cavab verib.
Jurnalistin “bir neçə ay əvvəl başınıza 10 milyon dollar mükafat qoyulmuşdu” sözlərinə isə Əhməd əl-Şaraa belə reaksiya verib:
“Bu, sadəcə pul itkisi olardı. Söhbət 25 il əvvəlki hadisələrdən gedir.
O vaxt 17-18 yaşım var idi. İndi isə düşüncə tərziniz 20 il əvvəldən tamamilə fərqlidir”.
Elay RZAZADƏ,
Gündəm24.az
