Bakının Binəqədi rayonu ərazisində mənzillərdən birindən içində 340 min manat olan seyf oğurlanıb.
Polis tərəfindən həyata keçirilən tədbirlərlə oğurluğun 1986-cı il təvəllüdlü Ş.Hüseynova və onun əmisi oğlu 1991-ci il təvəllüdlü Q.Hüseynov tərəfindən törədilməsi müəyyən edilib. Onların barəsində Cinayət Məcəlləsinin 177.3.2-ci (külli miqdarda oğurluq) maddəsi ilə açılmış işin ibtidai istintaqı tamamlanaraq Bakı Ağır Cinayətlər Məhkəməsinə göndərilib.
Məhkəmədə məlum olub ki, ev sahibi E.Müseyibov nazirliklərdən birinin vəzifəli şəxsidir. Oğurluğa görə tutulmuş qadın isə ev sahibinin oğlunun sevgilisi olub.
Belə ki, ailəli şəxs məmurun oğlu ilə 2021-ci ildən sevgili olub. Onlar əsasən E.Müseyibovun oğlunun istəyi ilə evdə görüşüblər və bu zaman Ş.Hüseynova seyfin yerini öyrənib. O, qeyri-qanuni yolla sevgilisinin atasının evinin açarını əldə edərək nüsxəsini çıxartdırıb və evdə kimsənin olmadığı vaxt oğurluq cinayətini törədib. Daha sonra seyf Bakıdan Şəmkirə aparılaraq açılıb. Həmin pulun bir hissəsi ilə özünə bahalı avtomobil alıb.
Qadın məhkəmədə bildirib ki, seyfi ona sevgilisi özü verib və pulları hədiyyə edib. Bakı Ağır Cinayətlər Məhkəməsinin 30 sentyabr tarixli hökmü ilə Ş.Hüseynovaya və əmisi oğluna 5 il həbs cəzası verilib.
Gündəm24.az modern.az-a istinadən xəbər verir ki, evindən 340 min manat oğurlanan şəxs Elm və Təhsil Nazirliyinin vəzifəli şəxsi olub.
E.Müseyibov məhkəmədə verdiyi ifadəsində bildirib ki, o may ayında əməliyyat olunub. Əməliyyat olunduğu gün ailə üzvləri ilə birlikdə xəstəxanada olub, əməliyyat xərclərini ödəmək üçün seyfdən pul götürülüb. Seyf onların yataq otağında saxlanılırmış və onun yerini yalnız özü ilə həyat yoldaşı bilirmiş. Seyfin hündürlüyü təxminən 40-50 sm, çəkisi isə 15 kq-a yaxın olub, bir nəfərin təkbaşına götürməsi çətin idi.
Seyfin yalnız bir ədəd açarı olub və bu açar həyat yoldaşında saxlanılırmış. Zərərçəkmiş deyib ki, ailə hər ay qazancından müəyyən məbləği seyfə qoyurmuş, oğulları isə seyfin yerini bilməyiblər. O, oğurluğun məhz mayın 11-də baş verdiyini ehtimal edir, çünki həmin günədək seyf yerində olub.
