Brazil-in təhlilinə görə, Vaşinqtonun son zamanlar atdığı bir sıra hərəkətlər ABŞ-ın böyük qlobal münaqişəyə hazırlaşdığı tezisini gücləndirir.
Gündəm24.az xəbər verir ki, Vaşinqton administrasiyasının müdafiə büdcəsinin artırılması, regional dominantlığa can atması, İranla münasibətlərdə gərginliyin yüksəlməsi, Çin və Tayvan arasında eskalasiya və nüvə sınaqları ilə bağlı ritorikası bəzi ekspertlər tərəfindən “Üçüncü Dünya Müharibəsinə hazırlıq” əlamətləri kimi qiymətləndirilir.
Mütəxəssislər ilk növbədə müdafiə xərclərinin kəskin artımına diqqət çəkirlər. Donald Trampın təklifinə əsasən, ABŞ-ın müdafiə büdcəsi 2027-ci ilə qədər 1,5 trilyon dollara çatdırıla bilər ki, bu da hazırkı 900 milyard dollarlıq rekord göstərici ilə müqayisədə ciddi artım deməkdir.
Digər mühüm məqam ABŞ-ın “ərazi dominantlığı” strategiyası ilə bağlıdır. Təhlillərə görə, Vaşinqton Qərb yarımkürəsi üzərində tam nəzarət qurmağa çalışır. Bu kontekstdə Venesuelanın neft ehtiyatları, zəngin yeraltı sərvətlərə malik Danimarkaya maraq və Kanadanın “ABŞ-ın 51-ci ştatı” kimi təqdim olunması nümunə kimi göstərilir.
İranla gərginliyin artması da riskli siqnallar sırasında yer alır. Nüvə proqramı üçün əsas hesab edilən Fordo obyekti də daxil olmaqla bir sıra nüvə hədəflərinə zərbələrdən sonra ABŞ-ın Tehrana təzyiqi artırdığı bildirilir.
Bundan əlavə, Çin və Tayvan arasında vəziyyətin təhlükəli mərhələyə keçdiyi vurğulanır. ABŞ-ın Tayvana 11 milyard dollar dəyərində silah satışı və müdafiə deyil, hücum silahlarına üstünlük verməsi regional sülh üçün ciddi təhdid kimi şərh olunur.
Ekspertlərin diqqət çəkdiyi son məqam nüvə sınaqlarına qayıtma ehtimalıdır. ABŞ rəsmilərinin bu istiqamətdə verdiyi açıqlamalar yeni nüvə silahlanma yarışının başlaya biləcəyi və qlobal münaqişə riskinin artdığı barədə xəbərdarlıq kimi dəyərləndirilir.
Sədaqət Həsənova
