Harvard universitetinin qidalanma üzrə mütəxəssisləri bildirirlər ki, kərə yağında ürək-damar sağlamlığı üçün faydalı hesab edilən yağ turşuları azdır və tərkibindəki doymuş yağların yüksək olması “pis xolesterolu” artıraraq ürək xəstəlikləri riskini yüksəldə bilər. Bu səbəbdən onların əsas tövsiyəsi kərə yağının çox miqdarda istifadəsinin məsləhət görülməməsidir.
Gündəm24.az KONKRET.az-a istinadən xəbər verirki, qida məsələləri üzrə ekspert İlkin Şirinov bildirib ki, bu fikirlər kərə yağının tamamilə zərərli olması anlamına gəlmir.
Ekspertin sözlərinə görə, insan orqanizmi yağsız yaşaya bilməz və yağlar həm beynin, həm sinir sisteminin fəaliyyəti, həm də enerji mənbəyi kimi həyati əhəmiyyət daşıyır:
“Harvard mütəxəssisləri doymuş yağların artığını riskli hesab edir və buna görə kərə yağının çox istifadəsini məsləhət görmürlər. Lakin bu, kərə yağından tam imtina edilməli olduğunu deməyə əsas vermir. Zeytun yağı, balıq yağı kimi daha faydalı yağların istifadəsini artırmaq mümkündür.”
İ. Şirinov qeyd edir ki, əsas məsələ kərə yağının miqdarı və tərkibidir. Xüsusilə soya, palma və digər ucuz yağların kərə yağına qatılması sağlamlıq üçün ciddi təhlükə yarada bilər:
“Tərkibi dəyişdirilmiş yağlar bədəni yükləyir və ölüm riskini artıra bilir. Amma təmiz kərə yağının özü zərərli deyil. Sadəcə heyvani doymuş yağlar normadan artıq olmamalıdır.”
Ekspert əlavə edib ki, orqanizm iki vacib yağ turşusunu — Omega-3 və Omega-6-nı özü istehsal edə bilmir. Bu yağlar beyinin və sinir sisteminin qorunmasında mühüm rol oynayır. Onların çatışmazlığı beyin funksiyalarının zəifləməsinə, ürək ritminin pozulmasına, immunitetin düşməsinə, görmə zəifliyinə və hətta hormonal balansın pozulmasına səbəb olur.
“Məsələ yağdan imtina etmək deyil, pis yağları azaltmaq, yaxşı yağları isə normada saxlamaqdır. Yağsız həyat mümkün deyil.”
